阿水@Nomads：香港教會最大問題：將自己睇得太重要
覺得近年某機構啲報告有種不痛不癢嘅感覺，聽君一席話，如聽一席話。
講到「更新」，香港主流教會想要嘅係一套方法或者一啲技巧，但我認為「更新」嘅核心應該係「神學」同「靈性」，而呢兩者係環環相扣、缺一不可。
我覺得香港教會最大問題，係我哋將自己睇得太重要；我哋太重視教會群體嘅興衰、存亡、成敗。我會形容，係一種集體性嘅自我中心。據我嘅觀察，呢個情況喺社運、移民潮同疫情之後愈嚟愈嚴重。
我哋忘記咗耶穌基督一個好重要同時好簡單嘅教導：「因為，凡要救自己生命的，必喪掉生命；凡為我和福音喪掉生命的，必救了生命。」（馬可福音 8:35）當我愈緊張自己嘅興衰、存亡、成敗，我哋愈容易失去最重要嘅嘢：真正嘅生命。
潘霍華喺《追隨基督》寫道：「當基督呼召一個人，乃是叫人為祂（for Christ） 而死。」佢喺呢度唔喺講緊殉道，而係講緊一種自願地、甘願地「為他者」（for others）嘅生命。我會詮釋基督唔單止呼召每一個個人，而係整個教會群體，亦即係基督嘅身體，活出呢一種生命，正如我哋嘅主一樣。
（原載於作者threads，題為編者所擬）
