由服侍拾荒者到成為拾荒者

香港經濟環境惡化，服侍拾荒者多年的Peter早前轉為半職，另一半時間則化身他過往的關懷對象──拾荒者，在街邊的垃圾桶執膠樽放入回收機，「好聽啲叫環保，實質係當賺返啲收入」。過程中他感受到旁人的目光，也對受薪服侍者的身份和責任，有了新的反思和自我批判。

試過在街上的垃圾桶找了半天，Peter都只拾到50至60個膠樽，一毫一個即合共只有5至6元收入，而且回收機要用八達通收錢，每張每天只可收3元，所以身上也要多帶一張八達通卡。他說其實拾荒者也難以處理太多膠樽，因為要佔用不少空間，加上要乾淨回收：拾完還要倒掉裡面的液體，也要沖一沖水，而且「樽身有時好污糟，垃圾筒入面會炒埋一碟，有些我都未必會要，例如有狗屎或者有食物醬汁，我都處理唔到。」

Peter形容，自己落手執膠樽時，便明白街坊所講靠自己雙手，至少不用靠人施捨所活出的「風骨」：「喺街兜一粒鐘，摷到42個飲品膠樽，當中得38個可以入到一毫子入樽機，即係只揾到$3.8，仲要分兩張八達卡嘟錢。揾咁少都做？都係嗰個自我批判嘅問題：點解做拾荒者就要搵少得咁離譜？但係做關顧拾荒者嘅人就可以有份收入？成件事到底發生了甚麼事？」

因為工作時數少了一半，在每週兩天半的工時以外，服侍拾荒者多年Peter開始嘗試「成為他們」，自問不能完全做到，「我希望做到三份之一，或者係一半？我都唔知有無可能。」他一直很欣賞程展緯和黃迺元，二人用上大量時間，親身進入基層勞動的身份去經歷和體驗，亦同時繼續扮演發聲者的身份，「我某程度上係跟佢哋學，當然仲差好遠啦。」

「我哋把口話，我哋謙卑無光環，但好老實講，人嘅軟弱入面，你不自覺會建立咗（光環）。」Peter說做社關的人始終會以一個身份示人，可能是社工，也可能是牧者，縱使他自己沒專業資格，最多說自己做社區工作，但很多街坊依然以為他是社工，「好根深蒂固，覺得只有社工，會因為工作需要先會接觸佢。就算你否認，佢也只會覺得你唔想認，喺佢眼中你都是社工。」

由不是社工的社區工作者，改變身份成部份時間拾荒者，Peter感受到當他翻垃圾桶時旁人的目光，一般人的動作不會太明顯，但其實是留意到或者會偷望你。有一次，有位媽媽牽著小孩走過，好奇的孩子見到有位叔叔在翻垃圾筒，便停下來看著他，但媽媽馬上拖走孩子：「唔好望啦！痴線㗎啲人！」他沒有回應，他覺得不需要，因為這個社會正是如此，以這樣的眼光去看另一個人。

作為「發聲者」，Peter反思自己其實在社會上有一定「光環」，而且每個月都得到一份穩定的收入，雖然不多，但與街坊相比有很大落差，而且為他們發聲多年，其處境也沒有太大改變：「我有時會覺得，好似我係藉著一個他者，反而唔係改善咗佢，而係改善咗我自己。」

Peter希望這自我批判可提醒自己，其實與所服侍的街坊的確有距離，需要再想怎樣可以更進入到其生活，而作為受薪服侍者，也要知道收入是從捐獻或資助而來，其實有道德責任去想：「當我攞呢啲資源嘅時候，我有無善用呢？係唔係用得其所呢？係咪一分一毫都用得啱，真的去到使用者身上？」

文：LikHang