呢班聖經人物點解被捕、點樣坐監？

如果有得揀，無人想坐監，但偏偏《聖經》入面，坐監嘅人一個接一個，好似跟得上帝，就預咗畀人視為眼中刺，唔摵走唔安樂。《舊約》有唔少人物坐過監，例如畀十個阿哥賣豬仔嘅約瑟、為瀕死國家流淚嘅先知耶利米、生而有神力嘅士師參孫。《新約》出名嘅坐監人物就有為耶穌鋪路嘅施洗約翰、使徒保羅、彼得等人。

▍  被家人、國人、愛人出賣

《舊約》嘅約瑟、耶利米、參孫，雖然坐監原因唔同，但一樣係畀某啲重視嘅人出賣。約瑟細個可能招招積積，發個異夢見到阿哥向自己下拜，但當佢差啲畀十個阿哥聯手殺死，最後「只係」被賣去埃及，應該都係痛入骨髓。本來打工做得好地地，為咗捉實惟一剩低嘅身份認同——信仰——而拒絕主人老婆嘅性愛邀請，卻因為咁而反被主人老婆指想侵犯佢而坐監。雖然之後佢飛黃騰達，做埋宰相，但呢段時間，佢努力工作之餘，應該只係默默承受針刺般嘅鄉愁。

參孫似孤狼多過士師，雖然不時一條友砌低非利士人，但一次都無帶過以色列人打仗。生而有神力，無乜邊個打得過佢，不過佢成世都似乎係個唔太知做緊乜、去緊邊嘅浪人。有神力但唔覺得要聽上帝講嘢，結果以為揾到一生最愛，終於可以有覺好瞓，卻畀呢個女人出賣，畀非利士人剪走長髮無咗神力、挖盲對眼，捉去本國坐監，幫佢地推磨打苦工。失去神力、視力、愛人，參孫卻在死前第一次向上帝呼求，雖然，同敵人同歸於盡嘅請求，仍然夾雜太多怨恨。

耶利米出道做先知，北方嘅以色列已經亡咗國，得返南方嘅猶太國。但當佢提醒同胞，好醒醒定定做人，其他「官方先知」卻責備佢做乜妖言惑眾，明明國家太平，邊忽似滅亡啊？耶利米仲因為咁而要坐監，如果畀小編講，他的罪名大概是「太愛自己民族」。

▍  傳道傳到要坐監

施洗約翰早耶穌少少出世，流連曠野叫人悔改。點知有一日傳道傳到行政首長希律嗰度，施洗約翰問佢做咩娶阿哥老婆，令佢非常尷尬，就將約翰下監，經文無講用咩罪名，但古時捉人未必需要咩罪名。約翰咁受民眾歡迎，本來希律都唔太敢殺佢，係有一日，佢老婆慫恿佢個女跳舞氹到班高官好high，希律問阿女想要咩打賞，阿女忽然話要「施洗約翰個頭」。被斬首之前，《福音書》記載施洗約翰質疑過，如果耶穌真係彌賽亞，咁點解耶穌唔救佢？彌賽亞唔係「叫被擄的得釋放」㗎咩？

彼得被捕嗰時風頭火勢，使徒雅各啱啱先畀另一個希律處死。《使徒行傳》無講彼得喺牆內有咩感受，但當天使救佢出嚟，佢以為係異象，直至出到嚟先發覺係真，可能佢已經打定輸數，預咗今鋪死硬，未必惶恐但也不抱希望。只係嗰時佢未死得，仲要捱多陣。

保羅唔只坐過一次監，喺羅馬坐過最少兩次。保羅坐監唔只佢一個，通常都有伴，比較出名係《使徒行傳》記載，保羅同西拉一齊坐監，然後有一晚唔想瞓覺，想唱歌祈禱，引埋其他囚犯留心聽呢兩個痴線佬，點解坐緊監隨時死，都可以唱到咁high。所以保羅坐監得嚟唔單只無悶悶不樂，更奮力寫信畀唔同教會，後來呢幾卷書更成為經典，列入《新約聖經》。其中一卷《腓立比書》，就有著名的一句：「應當一無掛慮。只要凡事藉著禱告、祈求和感謝，將你們所要的告訴神。神所賜出人意外的平安，必在基督耶穌𥚃保守你們的心懷意念。」

文：JC