自由辯：比起白衫導遊有幾無能 我哋更應關心自己嘅下一代

早兩日美國Youtuber IShowSpeed快閃香港，各大社交媒體都被呢位坐擁3800萬訂閱者、身穿紅色港足球衣嘅黑人Youtuber及Rapper洗版。

▍ 係咩令青少年不惜狂追？

數以百計粉絲衝出馬路，追住Speed架電車逆線狂奔，危險到連Speed都不停叫佢哋上返行人路；去到天后站，有粉絲跑上逆方向扶手電梯追星，有人跳閘，有出閘機更疑似被人撞毀。睇住呢啲直播畫面，我覺得好震驚，香港好似好耐無見過有咁大班人咁樣齊齊跑出馬路。

更令人震驚嘅係，依直播所見，追住Speed嗰班瘋狂粉絲望落個個都好細個，似係中小學生。究竟一個Youtuber嘅影響力有幾大，先可以令咁大班細路為之瘋狂，跑晒出車來車往嘅馬路，甚至不惜走上逆方向扶手電梯向上追？

而最令我震驚嘅係，當一位身穿黑色衫，望落只有七/八歲嘅小妹妹可以不假思索、好流利咁講出Speed嘅英文全名，（掹車邊仲係「Gen Z」嘅）小編可以完全「零知」Speed係邊個。

於是我走去search呢位現年20歲嘅Youtuber嘅往跡，知道佢以做啲「無厘頭」嘅搞笑行為成名，包括喺直播扮狗吠、尖叫等。當中亦有不少出位且具爭議性嘅言行，例如涉嫌喺Twitch直播節目中以言語攻擊女性、喺打機時發表性別歧視言論、喺屋企放煙花差啲燒著間屋、直播中疑不小心露出自己嘅生殖器官等等。

我不禁問：究竟啲細路鍾意佢啲乜？正如我完全唔明依家啲細路點解鍾意睇Tiktok、抖音、小紅書一樣。而呢啲點解，其實係好需要被正視，好需要被探討。比起白衫導遊有幾無能，比起香港政府有無把握機會說好香港故事，我覺得香港嘅下一代更值得關心。

見到Threads有啲大人話：「條友乜水嚟？唔知咪唔知囉，我一定要識㗎？」、「依家啲細路睇埋啲咩白卡youtuber？」、「啲Gen Z失禮死人，六年前啲有理有節嘅細路去咗邊？」

如果你無生細路，亦都唔打算關心香港嘅下一代，fine；但我希望呢啲咁哽耳嘅說話，不是出自為人父母者、老師，或者其他從事教育相關工作者之口。因為當我哋要以「教育者」自居，我哋就無權戴住副有色眼鏡去睇自己嘅下一代，無權唔bother知道班細路平時睇啲乜嘢受啲乜 嘢影響，無權選擇以自己嘅無知為榮。

因為我哋永遠唔知，呢種無知，可以有幾大鑊。

▍ 大人要等到出事先如夢初醒？

Netflix最近出咗一套好紅嘅短篇劇集，叫《混沌少年時》（Adolescence）（警告：下有劇透，慎入），劇集講述一位13歲嘅小男孩Jamie被控謀殺一位女同學Katie。Jamie喺學校同社交媒體長期受到同學嘅嚴重欺凌同言語攻擊，令佢承受極大嘅心理壓力同創傷，同時Jamie喺網上接觸到「男性圈」（Manosphere）資訊，令佢不知不覺間深受極端仇女言論同文化影響。而凡此種種，都為Jamie（疑似）殺害女同學嘅暴行埋下伏線。

但好可悲嘅係，喺劇中，無論係Jamie嘅爸爸，定係負責查呢單案嘅警察，從來唔知校園欺凌係幾咁嚴重，莫講話介入同協助Jamie。喺案件發生後，警察完全唔知小朋友有接觸「男性圈」資訊，唔知咩叫「非自願單身主義」、咩叫「80/20法則」，唔知Instagram post下面嘅「紅藥丸」、「炸彈」emoji係代表啲乜。最後要由一個細路點醒個警察，班大人先好似發現新大陸咁，慢慢從碎片中拼湊返Jamie嘅犯案動機。但當班大人如夢初醒，大錯已經鑄成，一個年輕女孩嘅生命已被奪走，回魂乏術，而一位年輕男孩下半輩子都好可能繼續身陷囹圄。

所以如果你今日做緊人呀爸呀媽，但你完全唔知自己個仔喺馬路拔足狂奔追住嘅嗰位人兄係邊個，其實你呢刻應該要驚。因為今日你可以唔知Speed係邊個，聽日都可以唔知自己個仔間學校發生欺凌事件，可以唔知佢同同學成群結隊去食「太空油」，可以唔知佢幾時走咗去「觀濱」同人free hug free kiss。而呢種無知，絕對不值得光榮。

喺現今娛樂碎片化嘅年代，你唔識某啲網紅某啲明星，不足為奇，亦不足為恥。唔識Speed唔係罪，我本身都唔識。甚至你唔鍾意呢種為流量無所不用其極、嘩眾取寵嘅「網紅文化」都無問題，小編一樣對呢種文化極之反感。從來無人叫你要即刻走去subscribe Speed，要睇晒佢啲直播片去令自己入流。但最起碼我哋要保持開放同謙卑嘅態度，放低「老屎忽」心態，嘗試了解同學習新生代嘅語言同文化，嘗試用返小朋友嗰套語言嚟做教育同溝通，嘗試多啲關心我哋嘅下一代，同最重要嘅係，適時作出引導。

我同時亦想同所有香港人講：做人把口唔好咁臭，寛容啲啦。

唔知點解當大家識講15、16歲嘅金賽綸好脆弱好需要被保護嘅時候，對香港嘅細路就特別苛刻。但凡有學童自殺事件、校園欺凌事件、「太空油」事件出現，總係有一大班大人衝出嚟批判啲細路，話我哋以前點點點，依家啲細路點點點，跟手加多句「一代不如一代」。究竟講呢啲批判說話，除咗貶低別人抬高自己，令你自我感覺良好啲之外，對整個社會有咩益處？呢啲無用嘅說話，究竟發放緊啲乜嘢訊息、營造緊一個點樣嘅社會比下一代？

當我哋啲大人成日話當年嘅時候，我哋必須要意識到，世界已經唔係當年「打仗食樹皮」咁樣。智能手機、社交媒體、AI等科技產物嘅出現，為小朋友嘅成長同教育環境帶嚟咗翻天覆地嘅改變。面對前所未有嘅挑戰，正正考驗大人有無一種胸襟去理解同接納時代嘅轉變，並引導下一代行一個啱嘅方向。

《混沌少年時》嘅最後的一句對白，係男主角爸爸抱住隻毛公仔喊住咁講：「I should’ve done better」。

下次當我哋想去責難下一代做乜走去欺凌其他小朋友，做乜去食「太空油」咁唔潔身自愛，做乜郁啲走去自殺，希望我哋都會記得：我們都曾是一位混沌的少年。面對眼前每一位混沌的少年，我哋可以選擇成為一個更謙卑嘅大人。

We all have the choice to do better.

（編按：分題為編者所擬。）