新筆由紀：點解復活節年年都唔同日期嘅？

嚟緊星期五係基督受難日，跟住星期日就係復活節主日。呢個係基督宗教每年最重要嘅節期，亦係幾百萬香港人由細到大都享用嘅長假期。但係你有冇留意到，復活節嘅日子係年年都唔同㗎？譬如舊年2024復活節係3月31日，前年2023係4月9日，明年2026就係4月5日。搞到阿媽都話好亂，究竟點解會咁嘅呢？

非常非常非常簡單嚟講，係因為復活節嘅日子唔係跟現代嘅公曆，而係同猶太曆法裡面嘅逾越節有關，逾越節日子又同春分有關。

複雜少少講，古代猶太人，以每年農作物初熟嘅春天為一年嘅開始，將最接近春分嘅新月初上嗰日定為新年第一日，再數14日就係月圓，就係逾越節。（即係話：猶太曆嘅第一個月第14日，就係逾越節。）然後，基督宗教依據《聖經》描述，相信耶穌同門徒嘅最後晚餐就係逾越節晚餐（或者預備逾越節嘅晚餐），晚餐之後耶穌被捕，然後安息日來臨嗰日（星期五），耶穌被釘十字架、死亡、埋葬，教會稱呢日為「基督受難日」。之後第三日（星期日）清晨，《聖經》幾卷福音書描述，有兩位女士（耶穌嘅阿媽馬利亞，同耶穌嘅紅顏知己抹大拉的馬利亞）去到耶穌墓前，見到復活咗嘅耶穌。呢日就係「復活節」。

現代嘅公曆入面，春分通常係3月21或者前後一日；而今年春分之後嘅月圓之夜，亦即係逾越節正日，係上星期六晚（4月13-14日中間嗰個夜晚，農曆三月十五、十六）；呢晚之後第一個猶太安息日，即係今個星期五（4月18日）日落至星期六日落中間。因此，今年嘅基督受難日，就係4月18日，復活節就係20號喇。

條時間線，簡單來講就係咁：春分之後嘅月圓之夜，就係逾越節；逾越節之後就係受難日，跟住安息日，之後就到復活主日。

另外，大家可能聽過，天主教同新教同東正教，連復活節日期都係唔同㗎喎！呢個完全係因為曆法嘅差異 —— 天主教同新教自從16世紀末期開始採用而家嘅「公曆」（即係「格里曆」或者「額我略曆」Gregorian Calendar），正教就一直沿用比較古老嘅「儒略曆」（Julian Calendar）；而依照「儒略曆」計算嘅復活節日期，通常都比公曆遲少少。不過，有趣地，2025年嘅復活節，喺兩套曆法裡面竟然係同一日呀！