活世信徒：你想讓教會成為學校還是教會？

教會同學校嘅分別係咩？有時作為一個信二代都會諗吓呢樣嘢，自細喺兒童主日學成長，Sunday school嘅觀念係根深蒂固，但當成長後，就會諗多啲。

呢種sunday school嘅形式有好都有壞，好嘅地方在於容易管理；同時學校嘅setting，可能喺品格嘅教育上有幫助。不過另一方面都會諗，用學校嘅setting去讓兒童喺教會成長，係咪一個好嘅方法？

或者要問嘅係；我哋想provide一個點樣嘅信仰童年俾一班兒童？對於上一個年代嘅人黎講，學校可能都係一個好愉快嘅地方。不過而家小朋友自細讀書壓力都好大，學校成為咗佢哋其中一個壓力來源嘅地方：要追趕成就，追趕成績......如果要讓星期日嘅教會生活都打造成學校咁樣，對佢哋自小去認識信仰，又係唔係好事？又會唔會將學校嘅印象帶進教會當中？

同樣當一個小朋友自小喺教會以呢種方式成長，去到青少年階段，同樣將學校等同教會、教會等同學校，佢又會唔會用咗對學校嘅價值觀來追求信仰？追求表現好，追求有好多崗位事奉......但卻忽略了生命同埋靈性嘅需要？

快樂感，或者係而家嘅兒童喺教會成長最需要嘅。自小讓教會成為兒童體會喺生活中與別不同嘅地方，需要有品格教育的元素，並唔會同建造快樂感有衝突。讓兒童感受到教會係一個快樂嘅地方，而唔係只係責任同埋習慣要去嘅地方。

咁樣先能夠讓下一代嘅每一個兒童，感受到返教會嘅好，同時增加佢嘅期待感，令呢樣嘢唔係被推動要返嘅地方。就好似Inside Out套戲咁，幫兒童喺小時候，建立多啲快樂嘅memory喺「教會島」上面。

教會要與學校一樣嗎？或者教會就必須與學校有所不同。