活世信徒：承傳需要空間

英超，曼聯又輸一場
似曾熟悉嘅情境又再出現
好耐無寫過運動信仰嘅反思

阿摩廉於十一月接任曼聯新任領隊一職
阿摩廉係費格遜後十任領隊之中
最後生嘅一位
頭幾場戰績不錯後
近幾場成績開始回落
同時球員問題又再湧現
同前任領隊坦克面對相類似嘅問題
好多人認為，球員嘅問題
甚至球會嘅問題，一直無改變
其實都係「咪一__樣」

其實由名帥費格遜退休以後，
去到阿摩廉，已是第10任領隊
其間呢十任
不缺少一啲名領隊同埋名宿
喺其他地方帶隊都有唔錯嘅成就
但去到曼聯，卻未能成功
喺費格遜之後，其實又點做到傳承？
或者係傳承之後，點樣前行？

或者需要嘅係空間同埋時間
一個時代嘅轉變，點都會帶嚟震盪
唔同嘅領隊有唔同嘅足球哲學同埋風格
球員、領隊，甚至球會上下
都有好多唔同嘅適應
認識彼此，建立信任度

但同時面對現實地睇成績
同埋表現嘅球會老闆同埋球迷
點樣喺當中取得平衡甚至給予空間
同樣都係一種學問
加上面對其他英超強隊轉換領隊之後
仍能持續強勢，當然會更加焦急
不過每間球會都有唔同嘅問題要面對
而曼聯嘅問題都非一日之寒
確實更加需要時間空間

同時面對媒體嘅炒作
曼聯現時已成為流量密碼
所有嘅一舉一動都被注視
但同時球會點上下一心去面對都是關鍵

教會嘅傳承都係一樣，近年教會老化
教牧有退休潮、教會領袖
事奉人員都開始要交棒
有時著重咗喺傳承呢個詞語
卻好少講傳承之後，接嘅人係點行
能否給予時間、空間
讓新一代去嘗試，是關鍵

同樣面對著重效益同埋人數嘅標準
點樣去平衡都係關鍵
或者喺講傳承之後
時間、空間去調整是必須的
同時點樣建立彼此信任度
點樣擁抱新時代嘅開始
點樣上下一心合一地前行
同樣重要

空間、時間、信任、同心

喺聖經入面，所有接棒嘅人，
無論係約書亞、以利沙、提摩太等，
其實佢哋喺接棒之後，
都有好多唔同獨特嘅經歷
或者事蹟未必有前人咁強，
甚至提摩太嘅事更有唔覺有著墨太多，
但畢竟……都有神俾佢哋嘅路走，
佢哋都按神俾佢哋嘅步伐去奔跑，
點樣忠心去做，
能唔能夠finishing well
其實接棒者自己嘅生命
有冇持續扎根喺神入面好重要，
同時記得神俾佢嘅路係獨特都好重要

抓緊召命，持續忠心

（原載於作者專頁 @christian_withlives）