懶鬼神學：【《破．地獄》談一場講道心法】

你有沒有聽過一篇好「地獄」的道？聽得道多都梗有啦。懶鬼看完《破．地獄》後諗，如果大家預備講章時，從這部電影學下嘢，可能會提升返個質素由十八層地獄去到十五層都唔出奇。好啦，一齊從這部電影學下嘢：

1. 細位佈局

電影成功嘅地方其一係入面嘅細位同佈局，例如「飲茶」。

飲茶在電影中係好重要的意象，唔係朋友唔使旨意同枱飲茶。有一幕HELLO文在靈堂見到個仔（朱柏康）打緊齋睇波，下一個shot就係朱康斟茶畀老豆HELLO文，老豆就翻跌隻杯唔飲。但當老拍檔明叔（秦沛）黎到，HELLO文斟埋茶俾明叔飲。

又有一幕，道生（子華神）和HELLO文開始破冰，HELLO文俾個茶壺道生聞一聞，道生識貨話係大紅袍，於是兩人又飲起茶來。

斟茶呢個佈局就已經話咗好多嘢俾大家知。

講道法101必定會教設計講章要有plot（我譯做佈局啦），但又有好多人講道係平鋪直敘，亳無設計嘅，最後就係嗰句：「願上帝祝福大家，願上帝憐憫大家」，願上帝乜乜物物，其實就係草草收場，完！

2. 前後呼應

例如一開場無耐，道生坐住架的士，後面有一架靈車緊貼住，係緊貼住喎，而道生嘅表情係有D哀愁嘅（疫情無工開，又欠人周身債）。電影最後一幕係道生和女朋友美玉（周家怡）坐住自己架紅色車，最初係同架靈車並排而駛嘅，但行行下，就分道揚鑣啦。

呢兩幕已看到導演嘅功夫，就係電影中一直強調人生都係坐住架列車，都唔知幾時落車。咁有人可以諗到好悲觀，但同樣亦可以好似美玉鬧爆道生咁：「你個人唔好咁負面得唔得呀！」

最後，道生見眾生，他咁話：「既然就係唔知前面發生咩事，咁咪開開心心去乘坐呢架列車囉。」

大家都知好多人講道，最後和最初個段可以係毫無關係，互不相干，最後就係「願上帝……」草草收場，完！

3. 言簡意賅

電影中有幾場嗌交戲非常好睇，你知啦，嗌交戲係可以拍到《東張西望》咁，嗌足一個星期，嗌到你悶為止。不過導演好高手，好多場嗌交戲都係點到即止，然後要大家停頓一下去反思。

好多人講道就長到一個點呢，明明有個法定時間，但九成人都過時，後邊打晒圈都唔理。

好多人以為講得長就係好？就算講得長都唔緊要，言之有物就得，最慘係三個例子都係同一個意義，然後個D 「依依哦哦」，「即係，即係」都係度燃燒青春（我嘅青春呀）。唔係大聲就好戲架，楊師傅，同樣唔係長氣就係好道架，阿SO師傅。最後就係……完！

4. 性格分明

電影中每個演員都有好鮮明嘅性格，諗起咗道生就會循住佢個人設去走。但我地好多人講道，就算保羅咁出眾，係漆黑裡嘅瑩火蟲都好，都可以講到成個人好平面，好平淡。彼得和雅各都係差唔多性格，以利亞和以利沙更可以令人混淆埋。

明明人物講道都比較容易掌握和引起共鳴，但聽完後會問，我聽過D咩呀？最後就係……完！

講住咁多先，因為懶鬼講道都唔係好，等我從《破．地獄》這個劇本學多D嘢，然後「破自己講道差」嘅地獄先。

（原載於作者專頁）