Eddie Ho：我的年少日記

睇完《年少日記》、天氣開始凍、遇到唔同人，令我回想許多事情，重新reconnect 好多感覺 🍂

嗯，主要是童年往事。以前唔覺，當人面對創傷，原來真係會好似斷咗片咁，選擇性忘記、或者故意迴避某些回憶。我嘅情況又唔至於唔記得，但係咁多年都刻意不深入地回想，最多只是描述、或者賦予它一個亮麗的意義，但感覺還是埋藏在心底。

小弟嘅童年，未至於好坎坷，但對於多愁善感嘅自己來說，是很痛苦的。一路成長，一路好羨慕其他人嘅背景同家庭，好奇係安定嘅環境底下生活係咩一回事🤔

無獨有偶，小弟讀嘅小學都係一間精英小學，對電影裡的精英主義並不陌生，同學們也很出眾。小弟就好似個電影主角咁，唔算係天生讀書嘅材料（雖然假假地呢家都有個master degree🤪)，加上各種環境因素，每日返學、喺屋企對功課都好痛苦，成日俾人罰、俾人話蠢。

我記憶中，幾乎無人關心自己嘅生活開唔開心 
（given that 我其實go through緊好多野）

輕生，小學果陣我唔係冇諗過（幾乎唔記得自己曾經咁諗），
望住個窗，只係冇勇氣，同埋唔想令屋企人傷心。

上到中學好轉，因為有人關心、同有返教會，反而係青春期我先修復緊人生同自我形象。不過嗰時已經大個咗，已經唔叫做童年，算係another part of my life。

「樂觀」除咗可能係性格，回想起來，亦係我嘅生存方法。當你得十歲八歲，覺得世界灰到幾乎生無可戀，又無人幫到你，除左自小有宗教信仰，就係靠自己同自己講：「唔緊要啦」、「算啦」、「堅強啲」。所以，雖然性格係people person，但好細個已經好獨立，都要欣賞自己頑強嘅生命力 👽

「音樂」可能真係小時候唯一嘅出口，對於一個小朋友嚟講，可能太多嘢講唔出，又或者都好想有人知道。當然啦，年少時候，玩音樂出風頭，就係想人哋關心、注意到自己。
時至今日，我覺得自己已經大概成為到小時候想變成嘅大人，一個會care about其他人嘅大人。睇開漫畫、電影嘅人都知，每個主角都需要一啲原因、經歷去成為一個英雄。唔少係想尋求redemption，一種自我救贖。

所以點解自己會走去讀社工、做音樂，對youth work有種莫名的執迷，雖然唔係英雄，但都自覺係個有理想嘅凡人。

面對驟現的回憶，雖有所感受，但發現自己已經夠強大去坦率回顧，唔需要迴避，大體來說過著滿意的生活，也為自己這些年的成長、工作，感到驕傲。

遺憾仍然係有，畢竟始終改變唔到過去，
始終我都唔可以時光倒流，返去保護曾經弱小的自己。
但正如電影，呢份遺憾可以係力量，
盡自己所能將愛同人分享，
同埋可以嘅話，出一分力去分擔人哋嘅痛苦。

Thank god for letting me know what’s love. 
對於生命，我仍然是感恩。

（原載於作者FB及IG）