米安：你有多難過我都知 又喊又笑約定再見

英國人的家常閒話：「今個週末有咩節目？」

我話：「週日去曼城AO Arena睇演唱會，來自香港的樂隊。」

英國朋友話：「哇！隊樂隊好勁㗎？AO個場好大㗎喎！」

RubberBand是我來英後第一個看的香港歌手concert，也是第一次去曼城這個場館睇show。在英國睇一次演唱會是件大事，想約朋友要睇下對方住得近唔近場地，事前要安排好人手照顧家中細路（唔似以前有外傭姐姐咁free）；要安排交通（呢度地方都好大吓，唔係坐地鐵到紅磡站咁方便）；然後又要book定位泊車食飯……

▍　開show前的柴米油鹽

前幾日被看完倫敦站的朋友Facebook洗版，終於輪到曼城站。約好幾個朋友一行六人去睇，這天是英國轉夏令時間的日子，代表告別又冷又濕的冬天，迎來溫暖好日子，也跟香港時差縮短一個小時，感覺上跟大家接近一點。七點開show，朋友訂了場館附近一間香港人開的小館食個early dinner，甫踏入小店，便看到幾張海報，有RubberBand的Ciao World Tour海報，也有將在五月來英的明哥「邊走邊唱」海報，未坐低，已感溫暖。

店內幾個年輕人忙著好有勁，小店既有海南雞飯、滷水豬手飯；又有泰式湯河，韓式壽司卷；既有中國茶又有加上忌廉的泰式凍奶茶，說不出是賣哪國家的菜式，就是香港的味道——咩味道都有。原來小店開了四個月，生意看來不錯，年輕人說︰今日特別多生面口客，應該都係來睇RB的。

吃過香港味道，準備進場，我們時間預得有點趕，到達偌大的AO場館要先到櫃位取預訂票，隔著玻璃窗口也是一張張港人面孔。告知預訂Number，女孩用一秒鐘便找出我們6張飛遞上，然後很緊張地用廣東話說：「快啲入場啦！就快開場！」突如其來的超高效率及趕趕忙忙，時空交錯般叫人有點措手不及，但又那麼熟悉親切。

▍　你有多難過我都知

「我地係嚟自香港的RubberBand」

「嚟得呢度大家都係自己人」

「好感謝千里外嘅你哋去明白我哋」

一入場唔洗warm up大家就很熾熱，6號話曼城站的氣氛比倫敦更熱烈。很多人談起及回味曼城站這場演唱中，大合唱〈假使世界原來不像你預期〉感動片段部份，究竟感動位是怎形成的？

這首歌陪我走過2019年後的瘋狂與荒誕，那時每逢感到絕望與沮喪，便立即塞著耳機打開Apple music找這首歌來聽，鎮定下，感覺就好似病發要即啪粒止痛藥解痛。離開香港後，或許我的時空仍停留在年多前，每次出現呢首歌總會令我毛管戙，而不是現在大熱的〈到底發生過甚麼事〉。

這晚當RB唱完明哥的〈今天應該很高興〉，音樂隨即響起〈假使世界原來不像你預期〉時，我整個人便如上身，全場也站起來合唱，6號第一個在台上忍唔住咽哽，「你有多難過我⋯⋯」唱到個「我」字，佢就唱唔落去要停低。為免自己同樣喊到收唔到聲，我發現原來劈盡喉嚨來唱可以止住眼淚，我瘋狂地搖動手機燈大聲唱，但後面的人可比我更大聲。全場大合唱原來是一劑發洩難以言喻的思念的方法，來了英國一年多未試過如此高歌過。

大會攝影師將鏡頭橫掃這刻美麗的港人燈海，然後再來觀眾大特寫，鏡頭隨意一掃，便看到邊唱邊喊的臉孔大特寫，這刻也忍不住流出淚來。這燈海，令人想起香港曾經出現於不同地方的燈海；這邊喊邊唱的畫面，是如此似曾相識。間中有「自己人」在人群中大叫：「唔好喊呀！」佢地愈叫便愈想喊，真係好衰。

▍　濕冷國度紅館空氣

Encore又encore，點唔捨得最後仍要說再見，大家分開前來一張合照作紀念，6號用中英文叫樂手及製作人蹲下來與台下觀眾大合照，他用英文叫外籍樂手「Step down」影相，然後邊傻笑邊自嘲說：「英文係咪咁講呀？我啲英文好差，我會惡補架啦。」香港人先明先識笑嘅港式英文，又引得全場大笑。一班香港人就是這樣又喊又笑中渡過這次「說了再見，約定再見」的重聚。

散場，亮燈，望望四周在一起的香港人，發現不少年輕夫婦帶著幾歲大的孩子進場，又有成年子女蹺著年老母親來看這場約定再見的聚會，是男女老幼，就如帶著上一代和下一代來赴約。數以千計港人一下子散場，在曼城街頭都幾壯觀。

以為轉夏令時間會回暖，但英國天氣就是一日四季，走出場館冷得要戴手套，重投到濕冷國度，背後是幾位男士用流利廣東話粗口談笑對答，沉浸在彷彿由紅館走到尖東食宵夜的聲音與空氣，為這趟約定再見重聚之旅劃上句號。

「不過再見之後，總會再見，這趟旅程上每一張臉，每一聲叫喊，我們都記住了。」——Rubberband 3月30日FB帖文

（圖：Rubberband FB圖片及影片截圖）