小熊媽媽：同牧者拍拖／結婚的十大好處

早前有台灣牧師公開徵婚，條件是要愛主、愛他和愛己，似乎很簡單。

你會有興趣同牧者拍拖、結婚、建立家庭嗎？

或者有啲人一聽到做牧者的女／男朋友，就耍手擰頭，千祈咪搞，但根據筆者細意觀察、謹慎推論，發覺做傳道人或者牧師的伴侶，好處其實多到數唔晒，而家係咁意列舉其中10樣，以供參考：

1. 生活自由，空間無限——教會牧者工作忙碌，通常週末、主日同平日夜晚都一定唔會要你陪佢（或者冇得陪你），令你有大把空間發展自己興趣，結交朋友，或者全情投入發展事業，佢都唔會反對，而且冇能力反對。

2. 教會拍拖，定期見面——雖然話牧者忙碌，但係你每逢返到教會，都一定見到佢，即係最最最起碼每星期點都見一次，已經好過好多唔得閒病嘅都市情人（long D更加唔好提）；而且，佢在教會必定以最佳狀態出現，所以你唔使擔心佢對你黑口黑面囉。

3. 信仰疑難，一call就掂——一般信徒遇到信仰疑難，譬如睇唔明聖經、畀同學同事考起，要搵牧者解答唔係咁易，起碼都要約你下個禮拜傾。但你就唔同，有專用熱線，保證有人回應（答唔答得到係另一回事）。

4. 狂蜂浪蝶，減到最少——而家好多人，唔理你A唔Available都死纏爛打，但如果你女友／男友係牧師，佢好可能避忌啲，或者畀多幾分面，人生自然少咗好多不必要煩惱。

5. 身份特殊，眾人仰望——牧者個女友／男友喎，團友會覺得你梗有啲過人之處（唔係牧者點會愛上你？），教會的姨姨叔叔都會對你恭敬少少，話晒遲啲好可能就係師母／師公。（女牧師個丈夫點稱呼，其實冇共識。是但啦。）

6. 教會內線，好多secret——你的牧者男友／女友，拍拖時字裡行間難免會唔覺意露咗少少教會內部高層機密，你聽埋聽埋咁多top secret，唔係畀你向外分享或者炫耀，而係可以更具體咁為教會、為眾人禱告，讓你愛教會的心更加增長。

7. 神學功課，私人補習——假如你有志讀吓神學（或者已經讀緊），你的牧者男友／女友就成為你的當然私人專用導師了，拍拖與做功課並行不悖，就好似考DSE一齊溫書咁，非常溫馨，諗吓都開心。萬一你做唔掂功課，仲可以請佢畀多啲具體直接提議添。

8. 二人同心，上帝開心——你兩個在教會同心事奉，互相補位，見證美好，必定感動到其他團友會友更加投入，教會必然興旺；就算感動唔到，佢地都會經常返嚟，八卦你地近況，所以都係唔會停止聚會，都係會間接令教會興旺，上帝一定開心。

9. 建立家庭，基督為主——將來結咗婚，生返幾個，畀佢地在愛心爆棚的基督化家庭同埋教會裡面長大，滿有基督長成的身量，簡直係天國在人間，你話幾happy？啊唔係，係幾喜樂！

10. 教會照顧，有瓦遮頭（只限大宗派）——如果佢服務嘅係大宗派或者富有教會，通常會提供住宿，婚後唔使為住屋而煩惱，你話幾好？香港來講，單係呢樣條件已經爆燈啦！

利申：以上全屬隨口袐笈，玩吓而已

預告：千祈唔好同牧者拍拖／結婚的十大理由