《正義迴廊》「表姐」莊韻澄專訪part2：我信有神但不想做基督徒

「我真係相信呢個神存在，我相信佢哋嘅道理，只不過我唔想做一個基督徒。」在《正義迴廊》中飾演虔誠基督徒「表姐」的莊韻澄，接受本台專訪時透露現實中原來都曾經舉手決志，後來卻感到難以再追隨這信仰：「我喺教會嘅日子入面，我存在太多疑問，而嗰啲疑問我仲未搵到答案。」

邀約莊韻澄訪問，源於觀看《正義迴廊》時，看到表姐這個虔誠基督徒角色，於是便以演員的名字「莊韻澄」和「莊端兒」（前名），加上「基督徒」等關鍵字搜尋，發現大量關於她與前度的娛樂新聞，內容大概是他們因是基督徒要「守色戒」，後來前度「偷食」等等。於是小編dm莊韻澄約訪，她卻回應：「其實我不是基督徒，那時候是記者去寫，我的確跟基督徒張致恒拍過拖，但最後都沒有成為基督徒。因為我是一個很尊重信仰的人，我需要深入了解才會去選擇屬於自己的信仰。如果你不介意我亦可以接受訪問。」顯然是個有故事的人，小編當然不介意。

▍　曾舉手決志　在教會覺得難尋真理

「我都有去過教會，我都曾經試過舉手決志，但後尾我追隨唔到呢個信仰嘅道理。我係一個好尊重信仰的人，無論任何一個宗教，佛教、基督徒、天主教都好，都係導人向善、好好嘅信仰，人類真係需要一樣嘢帶佢地走善的道路。但我喺教會嘅日子入面，我存在太多疑問，而嗰啲疑問我仲未搵到答案，如果我自己對信仰都有疑問，我咪就係唔夠虔誠。其實我係一個認真嘅人，所以我演表姐時，都係帶住一份執著去演。我都覺得表姐係有一份執著，正如我對宗教信仰都好有執著，我覺得神嚟㗎喎，唔可以開玩笑。」

在訪問中回想當年舉手決志，莊韻澄認為是有受到氣氛影響，心態是想「試吓」這信仰，亦有參加查經班等，「但我再約唔返帶我去教會嘅朋友，彷彿佢帶咗你去（教會）之後，就會扔下你。」後來她也有參與藝人之家的聚會，但她仍然感到迷失，感受不到其他教友所講的「屬靈」，「點解我硬係覺得好似好孤單咁樣呢，點解我喺教會入面，搵唔到我想搵嘅真理呢？」面對很多信仰的疑問無法找到答案，也找不到一起成長的夥伴，令她最後離開了信仰群體。

▍　基督徒所作所為引疑問：咁嘅？

最初離開教會後，她有繼續「自修」上網找資料查經，但後來終將信仰放下，卻是與身邊人的行為有關。「你翻查我之前嘅新聞都知，可能我先前嘅戀情，亦都係一個影響。佢係一個虔誠嘅基督徒，對外宣稱，咁但係佢所做嘅行為，令我好覺得：『咁嘅？』但我都會有個諗法：『咁神就係要改變佢哋，神就係要收一班有問題嘅朋友，令佢變返好㗎啦。』咁但係可能我覺得，我自己做唔到囉，我未去到可以好似表姐咁⋯⋯我自己都做唔到，我點去做一個教徒呢？⋯⋯做人都艱難㗎喇，你仲要做一個教徒，就更加難。」

身為藝人的莊韻澄坦言，世人對基督徒太苛刻：「基督徒就唔可以講大話，就唔可以婚前性行為，就唔可以點、唔可以點。」她坦言希望大家可以寬容點，也可以多聽不同的聲音：「可能接納一些有問題而又對信仰有興趣的人，會更易令他們投入呢個信仰。」

▍　彼得三次不認主喻不做基督徒原因

縱使相信神的存在，也相信聖經的道理，但莊韻澄說自己不想做一個基督徒，原因是她不想「綑綁自己」，將「基督徒」這個名字或身份放在自己身上。

在訪問的尾聲，莊韻澄提及彼得三次不認主的故事：「點解佢會三次不認主？我睇法就係害怕被人拉，害怕群眾的壓力，亦害怕影響自己。」從彼得的故事，莊韻澄彷彿看見自己：「可能我都係害怕架喎。學你話齋你曾經自己去自修，又去信呢個信仰，呢刻點解你唔認係一個基督徒呢？可能就係個害怕囉，害怕個標籤。如果我成為基督徒就要好負責任啦，會唔會人地當咗我係乜架？有班基督徒都成日畀人笑喎。我都會好勇敢同你講，可能我都真係害怕囉。」

文：LH