小學同學撰文懷緬羅啓鋭導演稱性情中人 堅毅有人情味
著名導演羅啟銳嘅小學同學陳玉琼最近喺聖公會嘅刊物《教聲》投稿，分享佢對羅導演嘅懷念。原來佢地係讀聖公會基愛小學，作者話羅導演細細個已經好勤力、有上進心、好堅毅，又對生命有熱誠，並且有人情味。
作者提到，原來羅導嘅《歲月神偷》其中一幕呈現嘅，正正係羅導演哥哥嘅故事：1967年3月8日凌晨時份，基愛堂陳佐才牧師同福利部主任繆志娟先生趕到醫院探羅導演病危彌留的兄長啟鑑，陳牧師為啟鑑洗禮，繆生就將佢嘅十字架頸鍊掛喺啟鑑頸上。
幾個月前，作者曾經喺《教聲》寫文悼念繆先生，文章觸動左啟銳嘅心，作者就同羅導分享基督教信仰，鼓勵佢珍惜現在、尋找生命意義，而羅導都好積極回應。但無奈羅導七月初突然離世，作者都感到好難過同遺憾，但知道左羅導演有返教堂崇拜，覺得或者佢喺尋道路上已經遇到主，唯有祝福佢可以享受永遠嘅安息同平安。
陳玉琼又話，啟銳係一位性情中人，今年父親節當日，佢喺小學同學群組表達左對亡父強烈、真摯嘅思念之情，令人動容。另外，佢又好支持母校，經常都出席校友會同母校既聚會，曾經同學弟妹分享佢嘅奮鬥故事。
