知唔知今日係Spy Wednesday？

知唔知今日係Spy Wednesday？提一提你啦，答案唔關SPY×FAMILY事，亦都唔關Jenna Ortega做嘅Wednesday事，而係同耶穌有關！

好，開估喇！因為今日係「聖週三」，係十二門徒中嘅「間諜」猶大出賣耶穌嘅星期三。「聖週」紀念耶穌在世上最後一個星期嘅生活，而星期三耶穌做咗啲咩呢？耶穌先前兩日潔淨聖殿、斥責文士同法利賽人後，祭司長同文士就諗辦法想殺害耶穌，但又怕逾越節郁手會引起百姓不滿而生亂。十二門徒之一、加略人猶大就喺星期三去見祭司長，要將耶穌交畀佢哋。祭司長佢哋梗係好開心，就應承會科水畀猶大。

最終猶大得錢無所用，兩日後耶穌被捕，猶大見到耶穌被定罪就後悔，想還返出賣耶穌得來嘅30塊錢畀祭司長同長老，佢話：「我賣咗無辜人嘅血，我有罪。」點知祭司長同長老答佢：「咁關我鬼事？你自己承擔責任啦。」猶大就扔咗啲錢喺殿中，然後上吊自盡。祭司長都無要返啲錢，佢話：「呢個係血價，唔可以擺返入銀庫。」傾咗一輪，佢哋就用筆錢買咗塊田，用嚟埋葬外鄉人，塊田於是畀人叫做「血田」。

（參考經文：馬可福音14:1-11；馬太福音27:1-10）

文：LikHang