聖詩唔啱音 年輕人難投入？

今年嘅港九培靈研經會上星期剛結束，早幾日信二代阿朗就投稿《低聲道》，講到選唱聖詩歌詞唔啱音、覺得講道填鴨式等問題，反問對上一代人大為激勵嘅信息，對年青一代會唔會只係陳腔濫調？前年曾經接受過《低聲道》訪問，分享聽港九培靈研經會感想嘅大學生Samuel就同小編講，對阿朗篇文有共鳴嘅位，亦都有啲觀察同慨嘆想分享。

Samuel話佢對阿朗篇文有共鳴嘅係「既然詩歌都唔啱音，點解唔索性高聲同讀歌詞？」個位，佢兩年前受訪時已經講過，港九培靈研經會唱嘅未必係年輕人聽開嘅詩歌，佢都會諗：會唔會出現比較適合年輕人嘅詩歌呢？佢話年輕人對於音樂係有啲執著，啱唔啱音、好唔好聽都係會留意嘅地方。「（不過）同聲讀歌詞梗係可以！」Samuel近排跟咗女朋友返聖公會，見到佢哋嘅聖頌係可以唱出嚟，亦可以讀出嚟，「Why not？」

不過，Samuel覺得即使唔啱音，有啲歌係有佢嘅意思，甚至係集體回憶嘅載體。佢舉例，每年培靈會最後一晚都會唱閉會詩〈當點名時〉，提到「在那邊點名的時候，在那邊點名我亦必在其中」，他覺得係幾好嘅差遣詩，「我每年唱都會喊，今年都喊到成隻狗咁。」「唔啱音還唔啱音，年輕人都可以受感動。」

兩年前係year 1，Samuel今個暑假已經出緊實習，所以今年只能夠聽晚堂。佢慨嘆參與港九培靈研經會嘅人數一年比一年少，本身都係信二代嘅佢同父母一齊去，父母話以前七點開始嘅晚堂，六點半去到已經一定要上閣樓，甚至要去樓上睇直播，而家就連閣樓都坐唔滿。佢仲留意到，最後一晚係特別多人，佢覺得培靈係要一段長時間，反問：「一晚點培到靈呢？係嚟趁熱鬧定真係培靈呢？」

雖然係咁，Samuel覺得港九培靈研經會仍然有存在嘅價值，亦睇到大會方面有所改變，下年嘅講員高銘謙牧師同董家驊牧師，都係比較貼近年輕人嘅牧者。佢又話，近一兩年都有約埋6、7個浸大團契嘅團友一齊去聽。

大家又有無去港九培靈研經會？又點睇呢個聚會呢？

文：LikHang