國際冷笑話日 一齊用笑話消暑！

唔講唔知，原來今日係「國際冷笑話日」，點解揀正今日？一定係因為前日大暑，不論牆內室外，都熱到痴線，所以需要國際聯手炮製最凍嘅笑話，為地球退燒！

如果你返教會一段時日，實會聽過牧者打爛笑蛋，然後喺冷氣加持下，令打瞌睡嘅弟兄姊妹心神為之一振。小編尋日向讀者徵收返教會聽過最爛嘅gag，然後串連成一條無厘頭意識流，務求釋放基督教嘅冷氣，令香港降温！你預備好未？坐穩喇～

▍    去完camp好攰點算？

熱心事奉嘅基督徒，暑假特別多搞作，特別熱、特別攰。去完一個青少年camp，可能仲有兒童聖經班要帶，如果星期六、日燒到盡，禮拜一又要準時返工，點算？

答案係：唔好返工，請假登山。因為登山「補瞓」！諗吓耶穌喺客西馬尼園祈禱時，彼得同佢兩個兄弟瞓得幾酣，就知登山「補瞓」有幾有效！

祈完禱，擘大眼，你發現自己去咗第二度，係咩地方？答案係：土耳其（禱已其）。。。

基督徒會奉上帝嘅名去祈禱，但有無諗過天父姓咩？我地成班小編唔係好明個gag嘅笑點，後嚟諗到兩個答案，一個係姓「張」，因為「張天賦」，另一個姓「羅」，因為「天婦羅」，而外國人係會將上帝嘅姓氏放喺後面。

基督徒又鍾意講，上帝長闊高深嘅愛，係無法測度。但有無諗過「愛」係咩顏色？答案：唔知道愛係咩色，但愛一定唔會係紫色，因為「愛是永不止息」。。。

上帝嘅愛如滔滔江河，但聖經入面最細嘅水池係咩？答案：畢士大池（「不是大池」）。

耶穌喺畢士大池叫一個癱子起身行路，彼得都試過叫一個婦女復活，「起來行走」。但有人竟然聲稱彼得其實係行咗另一個神蹟，點解？因為嗰個女子叫做「大比大」，彼得講嘅說話係「大比大，起來」（大脾，大起來）。。。

講起「大」，你知唔知聖經咁多人物，邊個去自助餐食得最多嘢？答案係：大衛，因為佢係「大胃王」。壓軸出場，當然係食咗約拿嗰條魚，唔係鯨魚，而係「吞拿魚」。

▍    人生咁痛苦，笑吓先啦

點解要搞gag？呢個問題有啲搞笑，因為係好認真咁看待「講笑」呢樣嘢。但人生無咗認真又唔得，而「認真」同「笑」好似有衝突，所以「講笑為乜」似乎無法迴避。

最近有本書《無聊爛Gag怪》，都有提到「爛Gag嘅好處」，除咗為苦短人生加添歡樂，「創造dead air，令聽眾齊心想打你，可能就係團結世界嘅關鍵！」，小編最鍾意都係「保持童心」。

小朋友嘅笑通常都係開懷大笑，純真快樂，大人嘅笑複雜好多，有時係令自己免於面對苦難嘅麻醉劑，有時係應酬客人嘅「假笑」，有時甚至係「嘲笑」、「冷笑」。當然，都有紓緩壓力嘅黑色幽默、朋友相知嘅會心微笑。

至於上帝會唔會笑，或者唔重要，但耶穌救人，為咗人唔使再尋求救贖，可以自由、喜樂，而喜樂嘅人，應該唔會無得笑，剩係捱苦吧。

文：Jon