十誡次序都有唔同版本？「當孝敬父母」係第四定第五誡？

「當孝敬父母」係十誡第幾誡？有人會答第四誡，有人會答第五誡，其實答案係：睇你教會係咩宗派。

噚日講「孝」個post引述一位校長嘅文字，講到天主教中第一至四誡都係神人關係，第五誡就到孝敬父母。小編收到天主教慈幼會嘅陳頌軒修士指正，話天主教嘅十誡同新教部分宗派唔同，第一至三誡係講人神關係，第四誡係孝敬父母。佢解釋，聖經本身無標數字，所以有啲分法上不同，有啲合埋，有啲拆開，就好似3-6節天主教合埋做一誡，新教部分宗派就分為兩誡。

其實呢位校長都唔係第一個錯嘅人，2013年就曾經有位法官判案時，批評一位身為天主教徒嘅校長被告砌詞狡辯，係犯咗十誡第九誡「不可作假見證」，但天主教嘅第九誡其實係「毋願他人妻」。

至於點解會有唔同呢？陳頌軒解釋係傳統不同，天主教跟隨西方教父奧古斯丁嘅傳統，東方教會跟隨希臘教父嘅傳統。《天主教教理》都有段文字解釋呢個問題：「在歷史的過程中，誡命的劃分和編號曾有變化。本教理仍隨從聖奧思定（奧古斯丁）所做的分法，這分法已成了天主教的傳統。這也是路德會的傳統。希臘教父所做的分法稍有不同，這分法可見於東正教會和改革教會的團體。」

對於十誡嘅分法，中大崇基學院神學院助理教授任卓賢講解，主要係講「人與神關係」同「人與人關係」有「三七」同「四六」兩個分法，分野來自奧古斯丁提出「三七」，因為佢覺得「不可有別的神」同「不可拜偶像」係同一樣嘢，而「不可貪戀別人的房屋」同「不可貪戀別人的妻」有好大分別，亦覺得「三」比較適合「三位一體」嘅上帝，而天主教就係跟奧古斯丁嘅。

所以，任卓賢話其實兩個版本都係來自同一個文本，問題在於點樣「斬」，分別不在於聖經文本嘅不同，而係詮釋嘅不同。

至於「三七」同「四六」之分，任卓賢提醒唔可以話係「天主教」同「新教」嘅分別，因為馬丁路德都係跟奧古斯丁，所以信義宗都係用「三七」版，到後來加爾文改革宗用「四六」版，就開始形成而家嘅分野。佢補充，「四六」版都唔係改革宗所創，而係同東正教一樣，而東正教嘅分法就來自希臘教父俄利根。

文：LikHang