講到「愛」港人會諗起咩？

今日520，講到「愛」，你會諗起咩？有人會諗起戀愛，有人會諗起朋友，亦有人會諗起神，呢啲唔係小編自己亂噏，而係語言學者研究收集得來嘅結果。

「Small world of words」係一個大型科學研究，遍及全世界19種語言。參與者會見到唔同嘅詞彙，然後將腦海中即時聯想到嘅單字打出來，而研究團隊就係想探索詞彙組成嘅奧秘。系統會儲低每一個回應，然後顯示出比較多人嘅回答，並且將佢視覺化：顏色相同就代表答案之間有關。

揀「廣東話」然後輸入「愛」，會見到有一堆同戀愛相關嘅答案，包括結婚、情侶、男朋友、女朋友等。其他答案有啲係身份，好似朋友、家人、父母；亦有一啲係特質，好似愛心、包容、關懷、犧牲。仲有一個答案，喺正個「愛」字隔離：神。

如果改為揀「漢語（普通話）」，答案其實大同小異，不過就唔見有「神」，亦有唔見有上面堆特質，反而多咗一堆同「情」有關嘅答案，好似感情、情感、友情、親情，仲有幾個有趣嘅答案：受、日語、台灣。

參與香港區研究嘅教大語言學及現代語言系助理教授劉擇明就話，從聯想詞嘅結果中，有時可以睇到一啲文化差異，例如有啲文化一講起愛，可能唔係諗起愛情，而係諗起宗教；另一個文化可能唔係諗起宗教，而係諗起父母。

語言本身嘅發展其實都有影響，就好似用「愛」呢個字來表達Love嘅意思，劉擇明話其實都係基督教傳入之後嘅事，文言文入面嘅「愛」字並唔係咁用，而係用來表示愛好。就算睇廣東話、客家話等南方漢語，個「愛」字係表達「要」嘅意思，就好似而家我哋都會話：「你愛唔愛呢樣嘢？」

講返個研究，劉擇明話睇返過去研究其實都知道，喺大部份語言中嘅聯想，都係同意思有關而唔係同聲音有關，好似見到「水」你會聯想到杯、果汁，而唔會聯想到衰、碎。類似研究其實先行者係英文，百幾年前已經有人做過，當年科技未咁發達，佢哋就寫一個字放入信封，寄畀幾百個人，叫佢哋寫低聯想到嘅字，然後寄返番去；又試過請人全職朝九晚五咁做，但做過一粒鐘都覺其實唔係好人道，就算當返工都唔係幾得。

香港區嘅研究負責人除咗劉擇明，仲有港大精神醫學系陳友凱教授，原來計劃最初係想用呢個方法，搵出邊啲人有思覺失調。劉擇明解釋，一般人同思覺失調嘅人喺詞彙聯想上嘅表現好唔同，而家獲得嘅數據足以比較兩者嘅分別，但係就未足以做一啲更深入嘅研究。佢解釋，要搵出詞彙之間嘅關係，分佈必須要闊，包括人名、地方名、職業等，有口語有書面語，甚至包括一啲奇怪嘅用法。

雖然已經收集咗好多年，但好可惜暫時仲未夠數，如果你識廣東話又識打字，不妨花五分鐘時間玩下，為廣東話研究出一分力啦！（網址：https://smallworldofwords.org/hk）

文：LH