難聽「安慰」說話 點解教友會咁講？

丈夫患病係上帝嘅試煉？定係對佢罪嘅懲罰？今時今日，其實仲有無基督徒會咁講？小編身邊唔少人都有呢個疑問，於是低聲道透過IG story問到200人，超過九成讀者（189人）都有聽過或者講過，接近三成讀者（59人）更承認自己都曾經講過類似說話。

讀者Keith分享，佢曾經患上紅班狼瘡症住咗29日醫院，當時聽過類似嘅說話：「雖然你而家有呢隻病，但其實可能係上帝俾你既祝福/試煉，要對佢有信心。」、「會唔會你有呢隻病係神俾你既懲罰，要你歸向神呢？」佢話聽到時真係想反面加爆粗。

除咗「試煉論」同「懲罰論」之外，仲有無咩「安慰說話」都好難聽？原來唔少人即使在生命的失去面前，都唔識收下口。Keith分享嘅一個例子都幾癲，佢見過朋友嘅教會group有人宣佈佢媽媽過身，然後啲人開始回應：「好得無比」。雖然保羅係咁講過，但咁樣用法，小編都覺得真係太癲......

Arthur見過有人家人往生，教友知道往生者信咗主，竟然講「感謝主」。佢仲有朋友小產之後，牧者同教友同佢講：「你咁後生，之後可以再生過啦。」結果佢quit 晒所有事奉以後唔再返教會，教會嘅人反而用「迷途嘅羊」形容佢。

仲有唔少難聽說話，似乎都係否定緊受苦者嘅苦痛。有位讀者試過呻下自己啲辛酸嘢，聽嗰個一句車埋嚟：「耶穌十架苦路仲辛苦過你啦。」又有人聽過「大把人慘過你啦！」仲有啲例子同「喜樂」有關，有人抑鬱畀人話「因為你唔夠倚靠神喜樂」，另一位朋友都聽過「做基督徒要常常喜樂，唔可以唔開心。你喜樂唔到，因為你唔信靠神。」

另外有個出事位似乎就係太hea，Pricilla嘅媽媽之前第4期肺癌已擴散，除咗有神蹟都真係無得康復，點知有人同佢講：「祝早日康復。」Terry就覺得最難聽（睇）嘅，係有人覆祈禱手手emoji，但Whatsapp標明咗係「轉寄訊息」。

講呢啲說話嘅人，其實心態係點？讀者Hannah就分享，細細個一直受嘅教育、聽嘅見証都係講所有苦難都係上帝畀嘅試煉，要畀我地去經歷主嘅同在，以前唔覺有咩事，甚至試過喺朋友分手嗰陣講，想咁安慰佢：「上帝會安排個更好嘅畀你呢」。但當佢自己經歷過情緒病後，係人哋口中聽返呢句，原來係幾「難聽過粗口」。 雖然道理上唔係錯，但係呢個情境下講嘅話，感覺上就冇咗當刻處理情緒嘅同理心，甚至係冷血。

睇咗咁多反面教材，希望大家都學到一課，陪伴在苦難中嘅朋友時，可以聽多啲、講少啲；真係要講嘅話，都諗清楚先好講。

文：LH