美國後生仔發起基督徒Nightclub

除咗香港有pastor bar，美國田納西州納什維爾近期都有間基督徒nightclub，邀請唔同背景嘅Gen Z後生仔參加，最近一次活動就吸引咗200人參與。

呢間叫做The Cove嘅基督徒nightclub，有三大原則：無酒飲、唔可以食煙，同埋唔可以用性挑逗嘅動作跳舞。DJ播嘅都係基督教流行詩歌，大家喺裡面跳舞，之前之後又會一齊敬拜、傾計同祈禱。

發起人係7個廿幾歲嘅黑人基督徒，佢地好想喺教會以外都有個地方，畀年輕信徒一齊玩同交流信仰。佢地覺得作為基督徒，好難搵到一個地方係又有得玩、又唔會同信仰價值觀有衝突，所以佢地創立咗呢個pop-up nightclub，希望可以令大家喺呢個世代嘅孤獨、焦慮、抑鬱、COVID、長期隔離當中，搵到出路。

原來當地教會都同香港一樣，疫情之後面對人數下降嘅危機，尤其係黑人教會。

呢個嘗試嘅效果似乎比想像中好。佢地上年11月搞第一次party，之前整咗個IG去宣傳，本身target係有1000個followers，最後竟然event之前已經有多過10K followers，「真係大癲啊」，其中一個發起人Jordan Diggs咁講。到而家三次party後，followers已經過咗25K~

「基督徒成日畀人覺得老老土土。我地想show畀大家睇基督徒都可以係正常同埋型囉，仲有都可以玩得開心。」

其中一個參加者話，「好超現實啊呢度~」雖然同教會環境完全唔同，但佢覺得呢度係一個群體，而教會其實就應該係要咁囉。

另一個參加者話：「我喺唔同教會有啲負面經驗，但當我嚟到呢度，感受到嘅係愛、喜樂，令我好鼓舞，係對我好大嘅祝福。」

你又會唔會想去呢個nightclub度睇下呢？

文：IC

圖：The Cove影片截圖

（資料來源：美聯社、The Cove）