婚前試愛 VS 拒絕婚前性行為

之前低聲道調查顯示，以基督徒為主嘅讀者中，超過一半受訪讀者唔接受婚前性行為，同香港青年協會之前嘅調查顯示，少於三成本港青年唔接受婚前性行為，都有幾明顯嘅分別。喺性方面睇法嘅分歧，都可能引來伴侶之間嘅衝突，100毛節目「圍爐取戀」日前就訪問一位同基督徒男友拍拖嘅女事主，佢好想婚前試愛或同居，睇吓大家喺性方面同生活習慣夾唔夾，但男友就因為信仰堅持唔得。

呢對情侶一齊咗兩年，女事主話大家都「會互相幫大家解決」，但去到「臨門一腳」男友就會輕輕推開佢，因為佢覺得性呢樣嘢「好神聖」，只可以同將來嘅另一半做。而女事主就覺得，結婚前要試下性方面夾唔夾，亦想婚前同居了解大家生活習慣，但男友就驚同居咗日日見面就總會忍唔住。

主持東方昇話佢理解女事主多啲，但都欣賞男事主有原則，今時今日「縱慾橫流」，男仔要忍到係極難，覺得佢衰極有個譜。女事主都同意，男友係比較會感恩擁有嘅嘢，亦會感恩女友對佢嘅愛。東方昇就覺得，女事主鍾意男友比較感恩、心地好，但性方面咁strict又唔鍾意，但其實佢係一個package，無得輸打贏要。

東方昇仲提出一個設想，如果雙方的性別轉換，大家嘅睇法會好唔同，即係男仔話女方因為係基督徒唔肯同佢親密，相信佢會成為眾矢之的，「人哋唔畀你，你要尊重佢決定，點可以迫人地。」

問題歸根究底都同宗教信仰有關，女事主就話，雖然初初有抗拒，但在男友極力推介下，都有去下聚會、睇下靈修經文，但就感受唔到喜悅同感動。雙方有諗過結婚，但如果要信基督教先可以，女事主都有諗過好唔好「夾硬信」，但覺得咁樣唔只係呃自己，都係呃緊男友，而佢唔想呃對方。

「唔係性嘅問題，而係溝通嘅問題。」東方昇就覺得，宗教係無得呃嘅，女事主唔會輕易「信住先」係因為都覺得宗教係神聖。佢覺得面前得兩條路，一係男友接受女事主未洗禮都同佢結婚，一係就女事主突然信或者迫到自己信，而女事主就話希望係前者。

東方昇覺得，呢對情侶要溝通嘅就係呢樣嘢，如果無答案嘅其實就係無得一齊。佢認為雙方各自都要搵下答案，男方可以問下教會前輩條線可以點擺，而唔同宗教唔同教會，都會有覺得要緊同鬆嘅位，佢哋唔係好熟宗教嘅人，如果觀眾有相關經驗，或者係教徒，可以講多少少有咩選擇。

唔知大家又有無相關經歷呢？對於呢個問題又點樣睇？無論你係咪基督徒，都歡迎同我哋分享。

文：LH