2023基督徒清單填後感

噚日我哋出咗個「2023基督徒（非打卡）清單」，24個鐘之後見到都有成200人填過。基督徒做清單上嘅事，並唔係為咗打卡擺上IG，呢張清單亦唔係一張「做得越多就越好」嘅「點心紙」，而係希望畀大家來到新嘅一年，有個機會回顧下自己過去一年做過啲咩、無做啲咩。

同幾位填咗嘅朋友傾過幾句，唔少回應都令小編幾感動，以下分享幾個：

▍ 發現少在教會外服事人

前年考DSE、而家讀緊醫嘅焦采溢覺得，2023年嘅自己同神close咗。不過，佢填完張清單，發現自己原來好少喺教會以外服事人。所以佢都提醒自己，來到2024年，要多啲接觸同埋幫助社會上有需要嘅人。

▍ 剔完反思自己做得夠不夠

社工系year 1學生Christy就話，做完個清單可以令佢回顧同反思呢一年同神嘅關係，喺邊方面可以做多啲嚟經歷神，「每個point都好值得去反思自己嘅屬靈生命」。

Christy話自己無剔到幾格，當中包括退修──佢一直都好想做嘅嘢，但佢咁耐以嚟都無做過，「我日日比忙碌嘅生活綑綁住，比神既時間永遠都唔足夠......我希望可以有一日乜野都唔做，剩係同神一齊，由神去安排我嘅生活，好好感受吓神比我嘅使命係咩。」

即使有剔嘅格仔，Christy都好認真思考自己做得夠唔夠，佢話自己的確有為幾個朋友祈禱，仲喺其中一個朋友身上，見證到佢嘅改變，「我做個清單嘅時候就會諗：如果我試下喺1個月每日keep住為1-2個生命祈禱守望，咁會唔會令多啲人可以經歷到神呢？」佢又話，自己係有傳福音，但福音係咪真係傳到入心呢？佢覺得自己可以傳完福音，繼續keep住為對方祈禱。

▍ 看到連結信仰有很多方法

自然/科學教育工作者Sky喜歡呢張清單嘅闊度，覺得當中有不少教會少提的項目，就好似探在囚者、聽歌睇戲反思信仰咁，睇到服侍上主同連結信仰，都有好多方法。佢仲覺得，透過清單好似連結咗香港其他信徒，令佢覺得自己不弧單，就好似佢身邊唔多人會為中國教會祈禱，但見到張清單就深信，總會有其他朋友都剔咗呢格。

Sky仲覺得，張清單有助佢認識自己更多──樣樣都值得做，但其實好難全部做晒，而佢有做定無做，反映自己服侍上主同世界嘅焦點。而「傳福音」一項，令佢好認真思考自己有無做，然後就問「點先算有做」，係咪一定要「三福四律五色珠」、直接同未信者傾信仰？如果唔靠「講」算唔算？「無直接帶人信主，咁自己有冇傳福音？」

唔知你填完又有咩感受呢？歡迎留言話畀我哋知。（未填嘅可以去story highlight填呀~）

文：LH