網民製AI圖「神之味噌汁」

見到呢個長頭髮、有留鬚嘅男人樣，好多人第一時間都會覺得係耶穌。有日本網民用AI繪圖，整咗張用青菜豆腐砌成嘅「神之味噌汁」圖，有人見到即刻諗起教會成日講嘅「煮耶穌」。

社交媒體「X」用戶「筒井.xls@エクセル関数擬人化本著者」post咗一張命名為「神之味噌汁」嘅AI繪圖，係一幅以青菜豆腐砌成一個人樣，而個樣就好似耶穌喺藝術同影視作品嘅形象。

「神之味噌汁」呢個gag原來由來已久，因為日本漫畫《只有神知道的世界》（神のみぞ知るセカイ）本身讀音，同「神之味噌汁的世界」嘅讀音同樣係Kaminomizo Shiru Sekai。就連動漫商品專門店animate，都曾經出過以此為題材嘅速食味噌湯，自稱係「暖心的神的味道」。

《只有神知道的世界》係愛情喜劇漫畫，名入面個個「神」當然就同基督教嘅神無關係，抽到去味噌湯，再由此抽到去耶穌，都係日本網民搞下笑，唔駛太認真。

甚至真實嘅耶穌，其實係咪好似圖中咁樣，長頭髮留鬚呢？其實都有唔同嘅講法。幾年前就有英國大學嘅研究，用耶穌同時代嘅骷髏頭嚟模擬，加上《聖經》對耶穌外貌嘅記載，還原耶穌可能嘅樣貌，就話佢可能係有一頭短攣髮。不過，近年又有人用AI技術，以都靈裹屍布嘗試還原耶穌個樣，結果又係一個長髮男人喎。

諗返轉頭，當我哋見到個青菜豆腐砌成嘅人樣時，就自然會諗起耶穌，都係幾有趣嘅現象，因為其實我哋唔知佢咩樣，只係知佢「無佳形美容」，就算見到佢都「無美貌使我們羨慕他」，甚至被藐視同厭棄，但最重要嘅，係佢為我哋嘅過犯受害、為我哋嘅罪孽被壓傷；因為佢受嘅刑罰我哋得平安，因佢受嘅鞭傷我哋得醫治。（參以賽亞書53:2-5）

文：LH