廣東話新譯「不可叫人小看你年輕」

「雖然佢哋大過你、老過你，但咪畀佢哋睇死。身教好過言教，你講嘅嘢，做嘅嘢，你對人嘅愛心，對主嘅信心，你嘅清白正直，全部都教得到佢哋有餘。」

上面呢段說話，睇完會唔會覺得熟口熟面？無錯，就係大家耳熟能詳嘅金句「不可叫人小看你年輕」嘅廣東話版，由突破機構副總幹事梁柏堅喺《時代論壇》專欄譯出嚟，後來收錄喺《時勢好惡，做基督徒好難》呢本書度。

梁柏堅近排同沙田浸信會合作，喺沙浸Youtube上載一連幾集嘅「堅係咁譯」系列，佢話過去嘅聖經廣東話譯本，多數都係將和合本等中文譯本嘅助語詞換成廣東話，比較嚴謹同直接，但佢就想用自己嘅語言比較生活化咁樣去意譯。

▍　「吃甚麼、喝甚麼」變「碌OpenRice、睇淘寶」

另一個有趣例子，係梁柏堅將「不要為生命憂慮吃甚麼、喝甚麼」譯成「唔好淨係顧住碌OpenRice，唔好成日掛住睇淘寶（牧師喺台上面講緊道呀，仲睇？亲～）」，佢話靈感來自佢去不同教會聚會，有時都會見到會眾聽緊道時，準備緊崇拜完咗衝去邊食飯。

睇落好似同聖經好唔同喎，梁柏堅解釋，經文其實處理緊「分心」嘅問題，而碌OpenRice、睇淘寶嘅做法雖然過去世界無，但就係今日世界中令我哋分心嘅事。佢話每次翻譯都係詮釋，由經文串連到譯文係有彈性，但係咪聖經本身可以接受嘅彈性呢？呢個判斷非常複雜，所以每次譯經文之前，佢都會閱讀釋經書、沉澱好耐，譯幾十字、一百字分分鐘係要成個幾兩個星期。

「係唔係呀？」呢個係咪你想問嘅問題呢？梁柏堅就話，佢最想令人對信仰好奇，當平時大家好熟悉嘅聖經，用咗完全唔同嘅講法，能夠令人產生疑問，「就算你想反駁我都好，個疑問已經出現」，呢個正正係佢最想人閱讀佢文字時發生嘅事。

▍　藉譯經文提醒年輕人勿忘初心

講返被譯成「咪畀佢哋睇死」嘅「不要叫人小看你年輕」，「堅係咁譯」系列影片第一集中，有位年輕人就問：「佢哋成班長輩，又點會聽我講呀？」梁柏堅話當講「不可叫人小看你年輕」時，其實即係話身邊有人小看緊你年輕。佢話有時人可能都會炆憎，點解唔係睇我做嘢嘅質地，而係睇我嘅年紀？點解好似只要我一年輕、係後輩，做嘅嘢就一定無咁好、甩甩漏漏？

經文中保羅叫提摩太「這些事你要殷勤去做，並要在此專心」，梁柏堅就譯成「留心自己嘅行事為人、教導人嘅說話，唔好分心。」佢話之所以強調「唔好分心」，係因為迫於環境，人可能會嘗試回應大家期望，但係唔記得咗自己初心。佢提醒大家，可能我哋返教會有初心、事奉有初心、返工有初心，「到底個初心係咪上帝畀你嘅呼喚？如果係嘅話，無論身邊有幾多人睇輕你年輕、覺得你唔掂，但你呢個初心要好好把握，因為呢個係上帝交畀你嘅任務。」

文：LH