模擬人生營會被指似邪教CAMP？

話說上個月尾有個叫「#目標驅動新人王 Life Game 2023」嘅模擬人生Camp，由於Camp嘅主題係比參與者重新活出想要嘅人生，因此吸引咗唔少教會嘅弟兄姊妹同未信嘅朋友參加。不過，上星期就有人喺 @nss.secrets 投稿，話喺Camp入面有啲不可思議嘅經歷，覺得好似入咗一個邪教Camp咁，仲引起好多人討論，亦有自稱傳道人嘅網民都話基督教Camp唔應該係咁。咁實際上又係點？到底發生過甚麼事？

▍　參加者：有種洗腦嘅感覺，「成個feel好邪」

參加者Grace係返開教會嘅基督徒，由細到大都喺基督教學校成長。佢同我哋講，Camp入面其中一個主要部份係體驗人生——「由15歲開始再活多次呢個人生」。

Grace覺得人生體驗還好，但就唔太頂得順傳教嗰part。第2晚嗰陣，有一刻個禮堂突然黑晒，然後有幾個著住白衣人喺白燈下行出嚟，其中一個係扮耶穌，又模擬審判日、夜行地獄，總之成個環境令佢好唔舒服。最後見到有班「上到天國」嘅人圍住兜KFC炸雞載歌載舞，而KFC嘅意思係指「King Finally Comes」！

Grace話喺敬拜、講道環節都見到有人激動跪低流淚懺悔嘅場景，令佢覺得Camp入面帶出嘅氛圍好奇怪，例如佢覺得大會灌輸一啲有關得救、基督徒定義嘅信息，同佢平日所接觸過嘅都好唔同，同埋有種洗腦嘅感覺，「成個feel好邪」！

雖然有唔好嘅感受，但Grace覺得Camp入面嘅遊戲經常鼓勵大家背經文，對於平日好忙冇乜時間讀聖經嘅Grace嚟講，呢方面都係有得著，令佢睇返多啲聖經。

▍　統籌牧師：戲劇形式表達「主再來」對生命的衝擊

營會義務統籌鍾樹森牧師就回應，佢理解未信者係有機會未必明白裡面嘅信息；例如突然間出現白衣耶穌、審判呢啲場景，其實係想喺遊戲末段，用戲劇形式模擬「主再來」，讓參加者體驗嗰種突發性、對生命嘅衝擊。

至於有基督徒參加者都對Camp入面嘅一啲激動場面感到唔舒服，鍾牧師就認為唔同教會嘅傳統、信仰表達方式都各有取向，但亦唔應用呢啲標準去評論個Camp「邪唔邪」。

鍾牧師話呢個Camp已經有近40年歷史，係世界性嘅營會，10幾年前傳入香港；就如事工名「Life Impact」一樣，都想藉此衝擊人嘅生命。營會其中一個比人討論得最多嘅天國筵席「KFC」，鍾牧師就話係因為成日都見到，想啲參加者離開營會之後，一見到KFC就可以聯想起「主再來」嗰種衝擊。

文：MM7