Free Jam餐蛋麵大賽實錄

大家仲記唔記得自己食過最好味嘅餐蛋麵係點嘅呢？餐蛋麵好似人人都識煮，但原來都可以創作出好多種做法。上星期小編們再去咗TGIF崇拜（想知咩嚟可以睇返之前嘅post）同參加咗佢哋聲稱係「全宇宙第一屆FREE JAM餐蛋麵大賽」！

大會預備咗調味料、配菜等食材，畀參賽者發揮創意，用自己嘅方式煮餐蛋麵。大會評審準則係按照創意、味道、擺位同清潔度嚟評分。我哋喺第2輪出賽，所以第1輪可以先觀戰。第1輪嘅參加者有唔同組合，有兩姊妹、媽媽同阿囡、兩夫婦、仲有單人匹馬嘅廚師上陣！佢哋為大賽都準備十足，只係用雞蛋同午餐肉都free jam到好多創意菜式，勁有心思煎蛋餃，甚至有奄列蛋包麵！搞到我哋超超超超緊張><

我哋最後決定用蛋漿煎午餐肉，見之前冇人用麵包，又拎埋嚟玩一份。首要考慮嘅都係想整返個有特色、有啲嘢會令人記得嘅餐蛋麵，同埋最緊要係撈麵要撈得好食！落完麻油同少量調味粉，再加啲蒜蓉、辣椒油、黑椒粉，當然要加埋芝士同泡菜，咁就完成到我哋理想中嘅餐蛋麵了，過程都幾順利~ 最後，我地贏咗第2名啊~ Yeah!

小編們雖然認真煮麵，但賽前賽後都觀察到各參賽隊伍非常投入，TGIF團隊成員話見到大家瞓身出嚟玩，令佢哋喜出望外。Benny牧師話，free jam餐蛋麵嘅源起係見到佢地free jam音樂嘅workshop好受歡迎，跟住諗起仲有啲咩可以free jam嘅時候，就諗到好日常嘅餐蛋麵，因為覺得好玩，講起就可以做，而且可以有唔同嘅style，最緊要係「認真地玩，玩得認真」。Benny牧師話見到大家玩得咁開心，認為都做到佢哋期望嘅效果。

Benny牧師事後亦分享做評判嘅深刻感受，「最重要嘅嘢，竟然係啲人最缺乏嘅！」，佢話，出前一丁最重要嘅就係麻油同調味粉，但比賽中佢發覺有好多人都冇落到呢兩樣野，搞到冇乜味。Benny牧師果然係牧師，做評判後講兩句都可以咁有信息~

你覺得大家嘅餐蛋麵整成點呢？除咗餐蛋麵之外，你覺得仲有咩可以free jam下呢？不妨留言講下~~

文：MM7、KF

＠tgif_worship