尊子漫畫都有耶穌？！

陪伴咗香港人40年嘅尊子漫畫，好可能真係要同大家講再見了。喺漫畫內容7個月內畀政府批評至少6次之後，連載尊子漫畫嘅《明報》今日出「編按」：「Emily版尊子漫畫及世紀版乜議員漫畫，將於14日（周日）起停刊，《明報》多謝尊子40年來與我們一起見證時代變遷。」

小編睇返近年嘅尊子漫畫，原來「耶穌」都出過幾次場。今年2月，香港「高才通」被揭批准曾因基因編輯嬰兒入獄嘅賀建奎來港，之後政府就要求申請者申報有無案底。尊子當時就喺《明報》畫咗幅漫畫，入面關口職員同「耶穌」講，因為佢有案底，唔批得佢「高才通」入境。

2018年6月，當時港鐵沙中線被揭剪鋼筋，尊子就喺《蘋果日報》漫畫度畫咗塊版，上面有疑似本身係基督徒嘅時任港鐵主席馬時亨講：「耶穌同我講，沙中線剪鋼筋係小事。」

2014年7月，正值佔中發生前夕，時任香港聖公會主教長鄺保羅大主教曾經發表言論，反對佔中，事後時任教省祕書長管浩鳴牧師話，鄺保羅常常會以「幽默風趣」的形式講道。尊子就喺《明報》畫咗疑似鄺保羅喺講台上面講：「耶穌基督釘十字架，無非奉勸大家唔好佔中，哇哈哈哈哈。」台下嘅人就捧腹大笑，話佢風趣、幽默、鬼馬、笑死人。

同大家回顧尊子筆下嘅「耶穌」，唔知大家印象最深刻嘅尊子漫畫，又係邊幅呢？

文：LH