曾偉延：神點樣睇SEN孩子？

有幸上咗佘枝鳳博士Sarah老師嘅課，題目係：用神嘅眼光看SEN孩子。佢透過潘霍華嘅「傷殘神學」，帶我哋一齊思想：當人身心靈軟弱時，基督徒應該點睇？潘霍華曾經問過一條好值得我哋反思嘅問題：「到底，當一個人身體殘障軟弱、情緒崩潰，甚至精神錯亂到做唔到好嘅選擇，我哋會點睇佢？佢仲有冇價值？」其實，我哋點樣睇一個軟弱嘅人，就反映咗我哋點樣睇「人」呢個字嘅定義，點樣睇生命嘅意義，甚至點樣睇神自己。

▌心中嘅提問：耶穌點睇軟弱人？

落堂後我反覆思想咗一晚，心入面不停咁問自己：耶穌，其實係點樣睇有障礙、軟弱、被世界邊緣化嘅人？

於是我翻開《馬太福音》，想睇下耶穌係點樣對待呢班被忽略嘅人。越睇越覺得，耶穌真係唔只係醫病咁簡單。佢冇企喺遠處等人嚟搵佢，反而係自己行埋去，走近一啲最少人留意、最易被排擠嘅人。

▌佢摸咗一個連碰都唔敢碰嘅人（太8:1-4）

一個痲瘋病人，連家人都避開，耶穌竟然伸手摸佢。摸，唔係講句祈禱就算，而係用身體去承擔對方被拒絕嘅經歷。我哋今日，有冇敢去接觸一啲被貼上標籤嘅人？

▌ 有人抬嚟一個癱瘓嘅人（太9:1–8）

有幾個人抬咗一個癱瘓者嚟到耶穌面前。耶穌見到佢哋咁有信心，第一句唔係「你好慘」，而係：「你嘅罪赦咗。」祂先望到嘅，唔係條腿，而係佢內心深處最需要被醫治嘅位。你身邊有冇人，等緊一個人帶佢去見耶穌？又或者，有冇人好似等緊有人真心望佢一眼？

▌無聲的手指，搵緊一份希望（太9:20-22）

血漏婦人偷偷摸耶穌衣角，因為佢唔敢出聲。但耶穌冇當佢透明人，反而停低腳步，望住佢話：「你嘅信心救咗你。」教會會唔會有一班 silent struggler喺角落入面等緊人認同？

▌兩個盲人，主動出聲（太9:27-31）

佢哋大叫：「大衛子孫，可憐我哋啦！」耶穌冇即刻醫，而係問：「你哋想我為你哋做咩？」祂想俾佢哋講話出自己需要。你有冇畀過SEN孩子自己講句：「我其實需要…..」？

▌啞巴，終於開口（太9:32-33）

一個鬼附啞巴，被趕鬼之後可以講嘢，但周圍嘅人就話耶穌係靠鬼王做事。耶穌無懼批評，堅持行義。當社會誤解、嘲諷、標籤一個SEN孩子，你會唔會企出嚟講句公道說話？

▌人山人海中，祂逐個醫（太4:24、14:14）

癱瘓、癲癇、殘障、瞎眼——好多人走埋嚟。耶穌唔係趕人走，唔係搞 show，祂一個一個咁醫，醫完先講道，身體需要永遠喺祂心中優先。今日我哋設計一個活動、一個服侍、有冇諗過邊個可能最難參與？

▌你會唔會係下一個伸手嘅人？

佢哋一直都喺度——喺學校、教會、屋邨角落、社會邊緣。佢哋唔一定大聲，但每一個眼神都可能係求救；佢哋唔一定識講，但每一個沉默都可能係傷痕。問題係，我哋有冇真正聽見、真正睇見？有冇曾經，唔怕尷尬，唔怕唔識點幫，都願意踏前一步，坐埋去，問句：「我喺度，有冇嘢幫手？」耶穌係第一個打破沉默嘅人，你會唔會係第二個？

（原載於作者FB，作者是2位SEN孩子爸爸、OneSEN 創辦人）