流散者們：為鄰舍披衣，義不容「遲」

尋晚探基層街坊，前往球場嘅時候遇見一個奇怪畫面：一個男人當眾除褲！露埋底褲……唔係！係成人尿片。我當堂嚇一跳，但冇得啖笑，而係叫其他同行者企後等等，我上前了解吓。呢個男人，貌似60、70歲嘅伯伯，可能係身體有突發性問題，亦有可能飲咗酒唔知自己做緊乜，又有可能係精神病發作，更有可能係上咗電（吸毒）。

我唔知。但既然「看見、動了慈心」，就再行近啲望吓咩料。佢肢體扭曲，狀甚辛苦，成個人無力企直要挨住花槽借力，雙腳好似發軟，好慢咁屈膝，最後打側瞓落地下。

我輕輕嗌佢「先生」，佢冇應我，個樣好痛苦但清醒。望望身邊，有一男一女企咗喺度打緊電話，我就直接問知唔知咩事。兩位市民，真係路人，異口同聲話「唔知」，但打咗 999。佢哋都係咁啱經過，見到伯伯好辛苦咁，幫唔到啲咩就不如 call 白車。

同隊友解釋狀況，愛莫能助。但有冇嘢可以遮住佢下身？我有一刻諗過除自己件外套。不過又咁啱，我見到有件風褸、有個袋係地下，直覺覺得係伯伯嘅，就拎過去遮住佢嘅下身。等多唔夠1分鐘，聽到熟悉嘅白車聲。救護員第一時間問「係咪飲咗酒」，伯伯擰頭，跟住佢哋就拎唔同儀器出嚟去度佢。

見有人幫佢，我哋打算離開現場，無謂阻住人哋做嘢。臨走之際，我好想多謝兩位路人，停低講咗句「多謝你哋，好彩有你哋咋，唔係佢都唔知點算」。女途人嘅回答實在發人深省：「唔算得咩！如果嗰個係你屋企人，你都唔忍心見到佢咁辛苦、咁瘀！」係喎。如果嗰個係我屋企人，我會有咩感受？如果嗰個係我，我又係咩心情？邊個會幫我呢？

一行四人行去球場，係搵露宿者之前，我哋簡單分享同祈禱。頭先整個過程我哋冇任何作為，反而路人嘅行動提醒我哋要及時行「義」，義不容「遲」。不過隊友亦都講咗一句，「好彩你拎件衫冚住佢」。我唔知伯伯點解辛苦到要除褲，但見到咁樣搵嘢幫佢遮一遮，正常不過？定係呢個城市已經將所謂「不正常」日常化，見到唔尋常嘅情況都當見唔到？

「我赤身露體，你們給我穿」——原來現實中係會咁樣發生。我更深嘅領悟係，呢個小舉動，唔係純粹拎件衫幫伯伯遮醜，而係維護緊剝落咗嘅尊嚴。當基層街坊除褲咁除低尊嚴已成日常，又有冇「不正常人類」幫佢執返起？

寫到呢度，我唔知點樣收尾收得靚。唯有照直講我想點：星期五，我哋會再探街坊。可能係一般人（甚至某啲教會/基督徒）眼中係唔正常架！咁樣關懷同行法喎。但對我嚟講咁先正常……如果「山下禾田」就係幫街坊「執返樽鹽」，我好希望更多傻人一齊做傻事。

都係收唔到靚尾，總之想一齊服侍嘅就 click link：bit.ly/the_alt_crop

（文章原載於作者IG，標題為編者所擬）