流散者們：無家者的離譜生活習慣

你睇到嘅，唔係破格嘅晾衫方法，而係離譜嘅生活習慣。

可能你見過無家者住喺隧道、公園、天橋底⋯⋯但，公路旁嘅草叢堆？

睇到我哋幾個一頭霧水。可能佢住過唔同地方，試過被迫遷或趕走，搵吓搵吓嚟咗呢個位。我哋估佢係有洗衫嘅習慣，但無衣架晾，唯有擺喺一舊舊草球上面等乾。其實佢好有智慧，但我哋慢慢覺得無奈。畀著係你，有得㨂嘅話，又會唔會將自己嘅底衫褲攤晒出嚟畀人睇？

我哋想行去望望，但無一條正常嘅路行得到，除非化身園丁披荊斬棘咁闖入去，（一到夏天都唔知佢哋點算）。諗諗吓咁做可能會嚇親佢哋，加上天色漸暗，唯有擇日再探路。咁啱抬頭一望，好諷刺，昔日嘅豪宅原來喺正隔離。樓市跌咗唔少，但跌幾多都唔關隔離事，因為佢哋永遠都住唔到。

「瓊樓玉宇沒有倒了陣形，咫尺之間卻有頹垣敗瓦。」

開頭用「離譜」嚟形容呢個情景，其實真係離晒大譜——呢個譜叫衣食住行，一般人都會滿足呢啲生活需要。大部分無家者卻係「非自願離譜」，住非人所住嘅地方，飲食選擇極有限，衫褲都要望天打卦。想正常啲生活，洗衫晾衫，喺佢哋嘅處境就只能離譜一下。咁當然，最離譜嘅唔係呢件事本身，而係呢個城市。

我哋唔想接受呢種離譜，唔想慣，唔希望慢慢變成日常。而對抗離譜嘅最好方法，就係比佢更離譜。係經濟下行、人人自保嘅氣氛下，我哋將會接待露宿者同埋基層街坊，仲墊資去搞盆菜宴。佢哋食完呢餐係唔會有回報㗎，但我哋就係咁離譜。如果每次付出都要計得清清楚楚，咁呢個城市就真係無盼望。請佢哋食飯唔係施捨、積陰德，而係想當返佢哋係人，想佢哋當返自己係人。有尊嚴地食餐飯。

離譜嘅唔係搞盆菜宴呢件事，而係呢個決定同信念。睇到呢度嘅你，我哋想邀請你「至少做一件離譜的事」，親身參與呢個宴席（暫時義工名額已滿），奉獻新年利是錢支持約30位流浪街頭或生活喺邊緣嘅街坊。PM 見！（有意支持者請向 @galut_hk 作者專頁查詢）