新筆由紀：恐龍 vs 創世？

位於香港東北面嘅赤州發現恐龍化石，要封島畀考古專家進一步挖掘研究。新筆由紀小時候都算係part time恐龍專家，聽到消息之後，啲回憶返晒嚟，幻想登島參與研究。

▍ 邊個創造恐龍？

點知，原來「發現恐龍化石」都為一啲基督徒朋友帶來一小陣困惑，或者勾起返一啲壓抑咗好耐嘅童年困惑 —— 《聖經 · 創世記》一開頭講上帝創造世界，每日創造一類型事物或者生物，到第六日創造咗人類，第七日收工休息，中間無提及過恐龍，而考古學又話恐龍喺人類出現之前幾千萬年已經滅絕，即係話人類同恐龍從來未相遇過。如果世界第六日已經有人，咁點解會有啲比人類早幾千萬年已經消失咗嘅生物？恐龍究竟係從邊度來㗎？

對於呢類困惑，坊間（尤其是反對基督教人士）有個最便捷嘅回應，可以即時跳到：「咁咪證明你地本《聖經》係流㗎囉！現代科學、考古、古生物學，早已經證明《聖經》不可信啦。」

至於基督教圈內，一般級數的傳道人回應，大概不出以下幾條路線：

講信心大你：你感到困惑，表示你未夠熟悉《聖經》；如果全然確信神嘅話語大有能力，唔好跟從「世上嘅小學」，就唔會困惑啦。

希望在明天：人類目前知識仍然有限，已經發現到嘅只係皮毛，點可能憑咁皮毛嘅認識就否定聖經真理？將來必定有一日，我地會發現《聖經》同科學完全冇矛盾。

聖經非百搭：《聖經》係神嘅話語，但並非講盡全世界一切事物，只係集中講神同人嘅關係；浩瀚宇宙裡面咁多嘢，就算神同我地講，我地都未必明。

公平啲講，呢啲傳道人已經好盡力，但佢地冇講，或者冇能力講，或者唔敢講嘅係：《聖經》並唔係咁樣睇的，《創世記》並唔係咁理解的。

▍ 地球究竟幾多歲？

歸根究柢，某啲基督徒嗰種「恐龍 vs 創世」困惑，係因為「年輕地球理論」(Young Earth Theory) 嘅基因影響，而呢個理論背後，係一套以純粹字面意義 (literalistic reading) 理解聖經嘅觀念。

而家科學界共識，地球係大約45億年前形成。但年輕地球理論相信，《舊約聖經》裡面一切敘述，都係客觀而且順時序嘅歷史記錄，於是嘗試整理裡面所提及嘅年份年期、人嘅歲數等等，加起來就得出地球嘅年齡，大約係六千幾歲，計埋加時補時，頂多都係一萬歲左右。其中最實牙實齒嘅，係17世紀一位愛爾蘭主教 James Ussher，竟然能夠信心滿滿推算出世界被創造嘅日期同時間，係公元前4004年10月22日下午6點左右！

如果地球只係得6000歲多啲，咁點解釋滅絕咗幾千萬至幾億年嘅史前生物？年輕地球論嘅狂熱型忠粉會話，嗰啲係魔鬼埋藏喺世界不同角落嘅詭計，用來迷惑人心，等你唔信上帝創造。而扮科學型忠粉就會話，地球經歷過挪亞嗰次大洪水之後，地質發生劇烈變化，根本唔能夠用現代科學假設來量度古代物質變化，你檢測到以為十億年，其實都只係得幾千年歷史，考古學用來估算年期嘅方法，只係自欺欺人。不過講來講去，兩種忠粉，其實都係同出一轍，為咗保護地球永遠年輕，可以去到最盡。

▍ 點解創世記冇恐龍？

年輕地球理論根本站不住腳，因為佢建基於對《聖經》嘅錯誤假設，夾硬將多種不同文學手法當成歷史陳述。事實上，《創世記》從來無宣稱自己開頭嗰部份（第1至11章，亞伯拉罕出場之前）係歷史記事，自古以來希伯來民族都唔係咁睇，所有認真嘅聖經學者都唔會咁睇。另一個事實係，就算係《舊約聖經》其餘部份，包括基督新教所稱嘅「歷史書」，縱然以歷史敘事手法撰寫，但係古代猶太人嘅歷史觀同現代歷史觀完全唔同，都唔可以、唔應該用現代人對歷史記述嘅要求，硬套落去。

現代聖經學者對《創世記》嘅詮釋五花八門，進路各自精彩，但萬變不離基本，大致上都係認為佢係建基於一套古代西亞／近東嘅宇宙觀，要傳遞某種對世界、對社群、對生命嘅信息，而唔係要記錄歷史事件點樣發生。簡單來講即係話，佢係神話式神學敘述（mythological-theological narratives）而唔係歷史記述。

幾十年來，喺世界上一般神學院，呢啲都係基本常識。喺香港，過去大約三十年來，大部份老師大致上都係咁上下睇法，上堂都係咁講，除非同學完全冇上堂冇聽書冇睇任何assigned reading，否則冇可能會陌生。

就算係差不多退休嘅資深牧者，都係大約卅年前讀神學啫，點解好似都解答唔到「恐龍vs創造」嘅難題？都係因為畀教會裡面嘅「食古派」食住囉。

大部份香港教會，以及世界各地絕大部份華人教會，都根源自神學觀念非常守舊嘅基要主義，從DNA裡面抗拒任何有別於「舊時嗰套」嘅講法。（「舊時嗰套」即係佢地自己心目中以為嘅祖宗遺訓，其實即係細個聽返嚟嗰啲，凝固咗以為係絕對真理。）牧師傳道夠膽喺教會講神話式神學敘述，隨時畀人鬧異端邪說、唔信方舟不是神話、唔信聖經真確，咁就大鑊全勝，真係要學耶穌班門徒話：「這樣誰能得救呢！」