懶鬼：僧少粥多的神學教育現象

看到有關神學生人數減少（如流散者們和中宣新任院長）的多番討論，懶鬼也湊下熱鬧講埋一份先。

少人報讀的原因，可能會係：

1. 移民潮影響

移民潮不單影響教會人數和奉獻收入，也有一班適齡入讀神學院嘅人走咗，咁少咗人報讀都真係唔奇怪。

2. 經濟下滑

這五年內買樓嘅人都差唔多要蝕住黎供，股票市場也非常波動。頂住香港經濟嘅兩大市場一潭死水，而教會最多中產人仕㗎啦，自然也會影響教會奉獻，再加埋第一個原因，好多教會已出現財政結構性赤字（只係有些教會因為底厚才頂到每月既開支），而神學生讀神學支出條數從來唔細，好多人都要靠教會資助，教會無錢，想讀嘅人就唯有暫緩報讀啦。

3. 網上課程的急速發展

不單單是香港，甚至是外國已有好多神學院係online上課（而且仲會向全球招生，包括香港，係FB和IG就不時睇到招生活動），咁香港既傳統神學教育模式，無可避免都要面對衝擊。

你可以話入讀神學院有群體生活，有生命互動唔係更好同埋更可以整全訓練一個傳道人咩？無話唔係，但百貨應百客，咁都有人唔想有咁密集既群體生活。而且，現在很流行斜槓式（slash）的事奉，大把年輕一代的傳道想做slasher，咁又駛咩要有群體生活既學習？況且讀online課程又簡便咁多，都一樣攞到個MDiv學位，免去舟車勞動做多份功課好過啦。

4. 2014和2019事件已被淡化

懶鬼無做很嚴格既研究，但歷史話俾我地知，凡香港地有一件事動搖人心，或感到前景不明時，就會有好多人讀神學，因為大家都希望「將最好的獻與主，獻你年青的力量，忠心為真理打仗」。

唔好講咁遠，例如1997（都好遠喎），例如2014和2019，你去查下呀，這些年份都有好多人讀神學架。

去到2023年啦，香港成個城市都靜哂，好似無咩話題，你最近仲有無聽過弟兄姊妹好不滿教會？都少咗好多啦，一來可能心死咗離開咗教會，二來仲投訴呢D野？成個社會已經無任何「危機」啦，因為振興經濟先至係大家現時最關注嘅，一齊夜繽紛都黎唔切啦。

大家都忙著生活，忙著在加息裡點慳D錢供層樓、諗下點保住份工、諗下係唔係要移民，諗呢諗撈，有排都未諗要讀神學，仲話要讀幾年咁多，都咪搞啦。

5. 會唔會係各大神學院收生嚴格咗？

6. 有些教會自設神學院，個餅又分薄咗？

相信仲有好多，好多原因嘅，要講真係一匹布咁長。

懶鬼反而想問一個問題，其實香港呢個彈丸之地，點解會有咁多神學院？具規模既教會又點解要自己開間神學院？而唔具規模既教會，都要開一間神學院或聖經學院？原因是宗派特色？自己訓練保証質素？証明基督教真係非常多元，可以各自表述信仰立場？但又真係無一點點的私心導致，又或不滿意其他神學院的路線和神學取向？

懶鬼收到風，今年好多具質素嘅神學院都係收到個位數的神學生，而無咁有質素嘅，個情況就更加可想而知。

但請放心喎，每一間神學院都一定話，係當初上帝給異象我地開㗎，所以係一定唔會執笠㗎。又係嘅，如果執笠，咁當初個異象咪get錯咗，唔得，唔得。

懶鬼都想上帝快D俾我睇到異象，然後開一間神學院，名都諗定啦，叫做……「把鬼神學院」！

（蒙允准轉載自懶鬼神學專頁）