HY：怕醜放榜故事2【放榜嗰日，我唔知醒】
記得放榜前一晚，同朋友去咗打邊爐、飲啤酒，然後返屋企再同大家連機玩魔力橋，就瞓著咗了。結果第二朝冇聽到鬧鐘差啲遲到，連焦慮、忐忑嘅時間都冇就趕返學校，最後skip晒所有校長講嘅打氣說話，凳pan都未坐熱就收到成績表。
自己一向都唔太看重成績分數，父母都冇比過壓力我（感恩^^），但一直有科主修預左唔過Lv3，所以已經預咗自己入唔到大學，好感恩最後個分比想像中好！有啲科比預期差，都有意外考得好嘅科目，仲記得嗰陣會覺得唔甘心，好似愧對咗老師一樣。同時，見到身邊有人因為考得唔好而喊，都有人因為意識到中學生涯真係完結而喊。無論備試定放榜，當中所經歷嘅情緒都好特別，係我未感受過嘅，記得要好好擁抱呢種情緒！而家諗返都覺得勁特別，可以分享畀子子孫孫聽xd
無論係考試、放榜，好感謝神都冇離開我，以下係放榜當日寫嘅一段字><：
「每日不停溫書、操卷、眼瞓、溫書、操卷嘅生活永無止境，自己喺信仰方面嘅成長步伐都放慢咗唔少。即使溫到好攰，都會開始傾向於循血氣地解決。但作為神所愛嘅兒女，我哋所求所想，神都一定會供比我哋，所有嘅重擔都可以卸給祂。往後一段日子，就算冇時間去靈修，我都會喺自修室單曲循環吓詩歌，又會開始試下更懇切地禱告（之前真係遇到大獲嘢先會祈）。呢一場考試，我知道自己並唔係孤軍作戰，好感謝一班組員，會特登過去學校附近同我食lunch、送超級多零食、得閒噓寒問暖同為我祈禱，亦感謝主嘅帶領，無論係入考場、放榜，都比我有平安、輕鬆嘅心情去面對，最後嘅結果超乎預期之外 😉
相信無論日後係學業，或者其他方面遇到困難，神都一定唔會撇下每一個人，將來條路係平坦或崎嶇，要走過高山或低谷，神都一定會為你預備最好，因為佢唔會要你行一條，你行唔到嘅路。」
雖然而家講有啲遲，如果所有社交媒體嘅打氣post會令你更緊張、焦慮的話，記得睇完呢個post就熄機，遠離電子產品！
同埋認真！無論入唔入到你想讀嗰科，都唔代表做唔到你想做嘅嘢。有書讀唔難，但重點係讀完之後，係咪向住理想嘅方向行，唔好比社會營造嘅假象模糊你嘅視線，社會、父母、同儕都唔能夠定義你，要塑造一個屬於自己的形狀，而呢個靈魂一定係美麗的(´▽｀)
就算而家入咗大學，我都唔係好確定自己嘅就業前路，但每一日都叫自己要做啲開心、有意義嘅嘢，祝願每一位DSE考生放榜順利，更重要嘅係搵到想做嘅嘢，然後繼續打機闖關！
#怕醜放榜故事2
【放榜嗰日，我唔知醒】
文：HY
