KF：怕醜放榜故事1 【以為OK，原來唔OK...】
記得放榜前一晚，我喺自己IG寫咗篇文俾自己，話「聽日想笑就笑，想喊就喊，我一定會視DSE只係人生裡面其中一個milestone。」到第二日放榜，我同朋友喺學校附近食完早餐，返到學校聽完Assembly，就上課室接成績單，過程唔使一個鐘。果然，我唔算考得好好，我好冷靜望住自己啲分，其實入唔到大學，真係只係夠分讀asso / high dip。冇幾耐，學校入面全部有份教過我嘅老師，竟然仲比我更加緊張，每個都逐一走過嚟關心問候我，陪我傾咗一陣，但我都竟然，就連喊都冇喊過。
因為自己之前已經一早報晒eapp，幾間社區書院都派埋conditional offer俾我，所以放榜嗰日，我只係需要揀讀邊間asso。我好「堅定」同佢哋講，「我已經諗清楚自己之後想讀咩，所以唔駛擔心我，我ok㗎」。其實，由細到大，我都俾老師、朋友形容為一個好「堅強」嘅人。每當遇到困難，好多時我都會習慣自己消化同解決，唔想俾人擔心。身邊嘅老師同朋友成日都會問我：「你O唔OK？」我話：「應該OK」。但其實根本唔OK。
返到屋企，我繼續好冷靜喺度諗，自己究竟想點行之後嘅路。打開電話，見到無論係教會、學校老師，個個人都send message問我考成點，有成10幾個message，但我就連一個人、一個group，都唔想覆。「唔想覆咪訓陣休息再算囉。」我同自己講。
點知合埋眼嗰下，我終於忍唔住流咗放榜日第一滴眼淚，一喊仲喊到收唔到。又瞓唔到又唔知點算嘅情況當中，一向鍾意喺IG寫長文記錄嘅我，決定打字，同自己對話，用文字梳理完自己處理唔到嘅感受同想法，就「祈埋個靚禱」，然後一瞓就瞓到天光。
「究竟我其實想做啲咩呢？細個諗住做老師，但係咪真係我最想做嘅嘢？咁玩音樂呢？到底我考完DSE，就算入到大學，為嘅又係咩嘢呢？我真係好驚，驚將來返工，我根本唔知自己做緊咩，唔知自己為緊啲咩而生活。但我知道，天光之後，我相信神會為我自己準備一個適合嘅位置，無論係玩音樂寫歌填詞，讀咩做咩都好，我都會忠於自己，亦都忠於父神俾我嘅召命。」
Erm…其實當時嘅我對於自己嘅夢想同前路都仲未有答案，都唔知自己想做啲咩，但我好感恩，自己當時有咁諗，有咁樣寫低自己所思所想。而家神真係帶領緊我用音樂、文字，回應我想關心嘅人同事！
無論你同我嘅夢想同經歷係咪差唔多，聽朝知道結果開心唔開心都好，都可以試下記錄自己一切嘅感受同想法，神係會知道㗎！願你相信神，亦都相信自己，搵到生命中想做嘅嘢，為主活出有理想、勇敢正直嘅你！
#怕醜放榜故事1
【以為OK，原來唔OK...】
文：KF
