阿Him：心在淌淚的光影

我想你睇《自由之聲》⋯⋯

（含劇透，請注意！）呢套戲其實已經上咗一段時間，但都唔見有人講或寫post，我諗可能因為呢排大家都討論緊「白日」同 「年少」，都唔得閒留意下外國嘅片。呢套戲11月頭賣廣告時已經吸引咗我嘅眼球，你知啦一睇到啲乜野自由呀，乜野發聲呀，會好敏感、好想知係講咩，然後知道係講人口販賣，仲要係真人真事就勁期待。呢套戲嘅放映場數有啲怪，一係晨咁早，一係就夜晚九點幾，係星期六日先有多幾場俾人選擇，可能發行商都知呢套戲較為冷門，所以場數都少啲，不過真係希望多啲人可以睇倒呢套戲啦！ 

套戲好睇在佢係真人真事改編，想像唔到男主角去營救被販賣嘅小孩嗰陣係有幾咁艱難。其實對於佢嚟講，喺美國做COP（編按：警察）已經就嚟退休咬長糧，冇咩必要再搵命搏，但佢就選擇左行呢條路。佢本身嘅工作已經係捉孌童犯，從而知道有大量兒童被販賣，當佢需要一路睇嗰啲孌童犯嘅罪證或電腦儲存性侵犯兒童嘅錄像時（佢嘅工作之一），不期然從眼角流下深痛之淚。睇住佢，我心裡面嘅激動亦令身體不期然抽搐起嚟，呢一份激動係見到被販賣嘅小孩面孔，係如此純真如天使，係未經污染嘅靈魂，但係卻被搶去販賣做性奴，而且講緊小孩嘅年齡係6歲8歲都有，如果你身邊有類似年齡嘅小孩俾人捉走，你會點算？ 

全世界嘅人口販賣無日無之，戲中講到全球販賣人口集團每年收益達到1500億美元，接近200萬個來自世界唔同地方嘅兒童被迫做性奴，有啲仲要每日進行性交易5-10次，單係數字已經令你覺得，要解決呢個問題實在太難、太沉重。最諷刺嘅係套戲係美國人拍，但係全球接收販賣人口進行性交易市場最大嘅國家，就係美國！套戲播咗半個鐘頭，見到有兩位觀眾疑似頂唔順離咗場，可能係頂唔順，除非唔係。 

有人問男角點解咁難嘅野都要做，根本冇人可以救得晒啲細路，牽涉好多政治，牽涉太多利益關係喇，但佢講左一句：「上帝嘅小孩係非賣品」！係呀我知小孩子係上帝所愛，耶穌仲叫班門徒要學小孩一樣，因為天國係屬於佢地嘅。但大前提係其實D猶太人社會不嬲都覺得小朋友喺社會同女性一樣冇咩地位又睇唔起佢地，俾我諗返戲裡面嗰啲販賣人口嘅人同啲變態佬嫖客，同樣係極度唔尊重每個小孩生命嘅尊貴，真係衰啲講句：「呢班人坐十世監都唔夠找條數呀！」

呢套戲係一套你一路睇，心裡面會一直淌淚嘅戲，你會好無力，唔想呢個世界發生呢啲事，甚至可能會令你逃避唔想知，因為太沉重，但係我想講： 「你要睇！」 影片最後有個彩蛋，心諗啲咁heavy嘅戲仲要搞啲咩彩蛋，做咩咁唔尊重呀！原來唔係喎！係男主角好凝重咁同你講，叫我地話俾身邊嘅人知要睇呢部戲，要關注人口販賣，因為喺呢個時代嘅人口販賣係比任何時期嘅販賣更猖獗，每日都有兒童被擄被賣被當性奴，我地雖然做唔到啲咩，寫咁大段野都剩係叫人睇戲幫唔倒啲咩，但係男角鼓勵話要有成千上萬嘅人去睇呢套戲，或有可能稍為遏止人口販賣充斥嘅氣焰。其實套戲已經拍好咗成5年㗎喇，但到而家先上到畫，當中就係因為好多政治同利益嘅裙帶關係糾纏，阻撓佢地發聲。 

咩叫「自由之聲」⋯⋯就係當呢啲小孩能夠被拯救，重獲自由，唱住歌跳住舞迎向你⋯⋯你想守望呢把聲音嗎？

大家快啲睇！或者支持下請啲人去睇，呢個都係男主角嘅呼籲嚟。呢條連結就係叫你請多啲人睇：

https://an.gl/sof-en-hk

（原載於作者FB）