Allen Ho：與DSE考生同行的反思

其實2017年，我都考過DSE😝

當時已經年過40嘅我，做緊年青人團契導師，陪教會嘅年青人去考，培養下「同理心」

入到試場，我知道自己一定係 5🌟🌟星星嘅考生

唔好意思，係5🐒🐒猩猩先啱😅

因為咁老去考，啲考生同監考員，當我係動物園啲猩猩🐒🐒咁睇😝

去到校門

校工：「考官，請去×××室」

我：「我係考生😅」

校工：「吓😨」

陪考者「單方面」想去同行，但到底應該用咩心態去同行先啱？

同行唔並肩，同行唔同步、唔同心

「被」同行者心諗：「你不如彈開！」

可能係職業病，好多時總係覺得自己一套啱啲，不自覺地就有「家長式」嘅「指引」同「教導」，從來無諗過真正嘅同行者應該點做。

▍　表面同行 但無並肩

典型嘅家長式教導，係由上而下，強弱分明。新嘅一代總覺得舊嗰套過時，上一代又覺得新一代嘅諗法唔係最好。好多時，用經驗「撻人」可能會引起反效果。我細個時，有啲老人家成日誇自己嘅經驗：「你細路仔識咩吖！我食鹽多過你食米！」（我會擔心佢地食得太鹹容易有高血壓）「我行橋多過你行路！」（可能容易啲有退化性關節炎）兩代嘅矛盾，其中一個原因應該係雙方都有執著。同行時要並肩，代表「同Lv」，即係有時要「降Lv」放下身段（起碼高嘅要屈身就下矮嘅先至可以並肩），甚至要紆尊降貴，同Lv並肩地同行。

▍　口講同行 但無同心

「同心」筆者理解為「同理心」，唔係同情心。同理心係設身處地，代入對方嘅處境去諗，咁做更加可以體會對方嘅感受，地位「同」等。英國護理學專家Theresa Wiseman認為同理心應該有以下特徵：

1，接受別人的觀點，嘗試以別人的眼光看世界。

2，不加評論，不帶有任何批判。

3，明白別人的感受。

4，與別人一起感受，並嘗試溝通。

要做齊以上四點，真係唔容易！

筆者要好好學習做一位同步並肩，有同理心嘅同行者，希望以後唔會俾同行嘅人叫我「彈開」！🙏