【長洲蚊患嚴重？】近排天氣開始熱，唔知係咪都多咗蚊叮蟲咬，突然出現好多關於蚊嘅神學討論。打頭炮嘅係flow church創辦人、建道神學院神學系副教授神學是粉紅色的秋 theologia autumnitas rosea est - 陳韋安。佢喺《時代論壇》專欄度寫咗篇〈#天堂有蚊嗎？〉，先從近日被問及「寵物可以上天家嗎？」嘅神學問題引入，話自己對呢個問題興趣不大，反而覺得呢個同「天堂有蚊嗎？」本質上係同一個問題，就係天堂有無動物存在嘅問題。

陳韋安引用中世紀神學家阿奎那反對天堂有動物存在嘅觀點，認為動物無「不朽壞」的形式，而且如果只有部分動物復活就唔公平，但所有動物都復活「大概也太多了吧！」佢又嘗試用科學統計估算，如果上帝要所有曾活過嘅蚊都復活，新天新地將會最少有9,266,400,000,000,000,000,000,000隻蚊。呢粒天文數字咁多個零，小編真係讀都唔識讀。陳韋安最後不忘講多句，仲有數以億兆計的烏蠅、曱甴、老鼠、蜈蚣、飛蟻、蚺蛇等緊大家。

文章刊出後引來從事精神健康方面事奉嘅「小驢」投稿《時代論壇》回應。題為〈#神學討論是用來傷害人的嗎？〉嘅文章批評陳韋安抽離地話寵物上唔到天堂，令佢極度不安同難受，因為文章過份輕率地回答一個對於好多人來講關乎生死的重要命題。佢話做精神健康服侍經常面對主人因寵物離世非常哀傷悲痛，對於佢哋來講，想像寵物離世後可以在天家重聚，係佢哋最卑微嘅願望，而佢哋需要嘅唔係確實答案，而係他人嘅明白同體諒。

兩篇文章引起網友討論，陳韋安昨晚將文章再貼在佢FB專頁，正當以為差不多告一段落，陳韋安嘅同事、建道神學院聖經研究部主任高銘謙 Lawrence Ko就喺佢FB同IG出咗篇〈#蚊要被剪除〉，話近來好像流行講蚊，根據學者Mary Douglas對利未記的詮釋，蚊在外型同行動習性上屬於潔淨的類別，但係由於蚊食血嘅飲食習慣極度不潔，而利未記有講明吃血的人要被剪除，所以「滅蚊有神學理據」、「因此，穿涼鞋時還是要留心腳趾尾，一發現有蚊，便要立刻把牠剪除。」

兩位 #建道 老師不約而同講蚊，Fox的安心詮釋版主就問：這是神學院購置滅蚊設備的神學顧問報告嗎？