衛蘭Be Still演唱會第一場結束後，被網上唔少人話似佈道會。同樣係基督徒嘅張敬軒，早前喺紅館演唱會都有唱〈遇見神〉同講信仰，點解觀眾反應會咁唔同呢？研究明星與粉絲現象的浸大電影學院助理教授劉慧嬋博士認為可能同觀眾嘅期望有關，因為演唱會本身始終係流行音樂性質，買飛嘅人未必預聽到好多宗教嘢，衛蘭演唱會有關信仰嘅篇幅比較多，佢都不難理解觀眾嘅反應。

至於張敬軒演唱會，劉慧嬋話佢最後一場最後一首歌先唱〈遇見神〉，言談間雖然都有滲入信仰元素，但感覺上都係自然地帶過，加上嗰段期間演唱會形象好正面，去到最後一晚其實觀眾都已經好受落，最後一首歌唱咩講咩觀眾應該都唔會介意。

一向有唔少藝人攞獎會感謝主，劉慧嬋話都好欣賞歌手有勇氣在公眾場合表達信仰，但佢嘅觀察係在非基督教場合，信仰表達可能真係要點到即止，否則會被其他人覺得太hard sell，自然感覺麻麻地，可能畀公眾睇到自己點樣活出信仰仲好。

有入場睇衛蘭演唱會嘅樂評人查柏朗 @chalong.list 就話，演唱會核心環節就係用咗一大段福音歌串埋，舞台同燈光設計都出現不少十字、唱第一首歌時就已經好似有蠟燭圍住衛蘭，都出乎佢意料之外，覺得華納唱片接受衛蘭喺紅館咁做都好大膽。

不過，查柏朗就覺得場演唱會並唔似佈道會，衛蘭本身講嘅嘢並唔多，而係用音樂同視覺帶出信息，佢自己就覺得係好好嘅處理。佢認為未必係因為福音歌令大家反彈，只要歌手唔係唱以往好hit嘅歌，用集體回憶引起共鳴就會咁。

@janice_vidal @hinscheung

文：LH
圖：華納唱片/The Show Must Go On