衛蘭Be Still演唱會被指似佈道會
衛蘭Be Still演唱會前日完結，有網民覺得太多福音歌似佈道會。衛蘭（Janice）接受傳媒訪問時回應，話自己好想同大家分享本身鍾意聽嘅歌，因為呢啲歌喺佢生命入面有好特別嘅位置。Janice話唔想做返以前做過嘅嘢，亦盡量想攞到平衡滿足fans，但作為歌手都有自己嘅諗法同信息想同大家分享，感恩公司畀佢好多自由設計run down。
對於第一場嘉賓鍾舒漫（Sherman）嘅「見證分享」被人覺得太長，Janice話其實係佢邀請對方分享，但佢分享時可能好激動，所以都真係無顧到時間，但Janice話覺得唔關Sherman事，安慰佢唔好因為呢件事唔開心，之後兩晚都執過流程，講一個比較短嘅版本。
Sherman受訪時就話都留意到網民意見，「無唔開心就假嘅，都有少少嬲自己」，佢解釋係溝通上有啲錯誤。佢話Janice睇住佢成個故事，覺得同演唱會Be Still個信息好夾，到佢講時可能太過緊張，又無預備好分享嘅次序，可能唔小心當咗觀眾係「隔籬個朋友」，講嘅時候「亂咁揈出來」，「真係好抱歉，造成咗呢個奇怪嘅現象，希望Janice嘅粉絲唔好介意。」
其實都有唔少人撐Janice，我哋上兩個post都有觀眾留言，有人話Be Still個名本身已經係來自聖經金句，所以都唔算係呃人落搭。亦有人話Janice本身都好有性格，選歌未必跟大眾口味，從心出發，宣傳演唱會時都講過演唱會嘅中心信息，唔算騙人入場。另外，都有留言話覺得係大眾對傳福音的刻板印象造成偏見，信徒可以反省下。
不過意見都有不同， @shouldchristian 就喺IG寫咗篇長文〈衛蘭演唱會點解會令人反感〉，話呢場係紅館演唱會，張飛賣成幾百蚊，歌迷辛苦搶飛點知係福音大碟，無論係咪忠實粉絲都會有期望落差；張敬軒、鄭秀文社交媒體都有持續滲入信仰分享，但衛蘭就相對收得埋。不過，佢都話香港人出名毒舌，而Janice嘅回應都大方得體，鼓勵佢堅持初衷。
Janice Vidal 衛蘭 鍾舒漫 Sherman Chung
文：LH
圖：娛壹/華納唱片
