我是一塊裹屍布，今天要和主分離……
我係一塊布。用質地嚟講，我係一塊細麻布；用功能嚟講，我係一塊裹屍布。
好多人識得我，因為我曾經包過一個人，雖然同佢相處時間唔算長，前前後後加埋可能都無三日，但今日同佢分離嘅經歷，我應該呢世都唔會忘記。
三日之前，有人將一條手腳有釘痕嘅屍帶來我面前，雖然條屍已經遍體鱗傷，但散發住一陣沒藥同沉香味。啲人用我包好條屍，就將我哋帶去一個花園，入面有個幾新淨嘅墳墓，將我哋放咗入去。
原本墳墓入面都仲有少少光，但好快佢哋就用一舊好大嘅石頭，將唯一嘅出入口封死。然後，墳墓入面就黑到伸手不見五指。呀唔係，我作為一塊布，本身都無手指，講錯咗，唔好意思。
同呢位主人相處咗幾十個鐘頭，本身都一直相安無事，都係同佢嘅肌膚貼到實一實、索咗好多血水、吸咗啲沒藥同沉香味嗰啲基本嘢，都係作為一塊裹屍布應有嘅本份。
不過去到星期日朝早，我突然有種成身鬆晒嘅感覺，原本畀我包住、貼到我實一實嘅屍體，竟然突然間唔見咗！我心諗：唔係呀嘛，幻覺嚟㗎啫，嚇我唔到嘅！但好快周圍突然間好光，連原本塞住洞口舊石都唔見埋！
過咗一陣，有個女人走入來望下我，然後又好驚咁走鬼咗。無幾耐，有個男人出現，企喺門口O晒嘴咁望住我，遠望都見佢身水身汗索晒氣咁，應該都係九秒九跑過來。
好快另一個男人都到咗，佢大膽少少，走入來望住我。我縮埋一舊攤咗喺度，我老友裹頭巾就喺另一邊，郁都唔敢郁。之後都有其他人來過，望吓我又走咗。
最後得返之前個女人企喺墳墓外面，望住我係咁喊。突然有兩個白衫人，坐咗係我同裹頭巾原本嘅地方問：「你做咩喊呀？」個女人就答：「因為有人將我主搬走咗，我唔知擺咗去邊！」聽到佢咁講我先知，原來我一直包住個人，叫做「主」。
個女人講完轉身，就見到呀「主」企喺度。我包住佢咁耐，梗係feel到佢就係佢，當堂都嚇咗一跳，但唔知點解個女人認唔到。主問：「你做咩喊？你搵邊位？」個女人仲以為係看更，答：「阿哥，如果係你搬走咗佢，你話我知吖，你放咗佢喺邊度？我就去拎返佢。」
主突然間叫女人個名：「馬利亞。」個女人就認得主，叫佢：「老師！」主就叫馬利亞唔好摸佢，因為佢仲未升上去見佢老豆，仲叫佢去話畀班手足聽，佢要升上去見佢老豆，亦都係大家老豆；見佢嘅神，亦都係大家嘅神。馬利亞聽完好激動，好快就跑走咗。
你問我有咩體會？死咗都可以復活、復活完又可以升天，仲要畀我親眼見到，我梗係要周圍同人講啦！你見到呢篇文，記住同我share畀人呀！
主復活喇！佢要升天喇！
