要建立信任 才有伸出援手的機會
尋日，嗎哪餐廳 @ministry.manna 同工係IG分享，早排幫咗一位經常嚟攞飯嘅婆婆收拾家居。同工話，圖中所見嘅就係婆婆屋企。其實，相關部門都曾經派人嚟，希望幫婆婆執屋，可惜一直遭到婆婆拒絕。
同工又話，婆婆日日都會到餐廳攞飯，久而久之會多左交流同談及往事，明白佢不輕易信任人，亦知道佢曾經比好多人傷害過。簡而言之，屋企嘅東西就係婆婆用來證明自己嘅存在。
直到最近，婆婆終於答應嗎哪同工同義工上門收拾屋企。「咩話﹗有餐廳上門執屋？」婆婆身邊嘅鄰居聞訊，都過黎向同工打聽兩句。最後，同工同義工仲幫婆婆屋企做左小小維修同準備傢俬，屋企變到新嘅一樣，婆婆都開心晒。
同工最後分享提到，其實重要係一份信任，依份信任令婆婆選擇相信同工，同時又係藉住每日傾計而累積返嚟。帖文hashtag仲話自己不務正業，但就要日日派飯，因為咁先可以日日見。哎呀，咁謙點得嫁，比個like你，因為同行真係好重要。
嗎哪餐廳係以餐飲為平台嘅機構，接觸同援助貧窮弱勢社群。佢地除左餐飲服務，仲有獨居長者清潔小隊、婦女活動同無家者同行計劃等等。如果你都care，都可以以飯券支持佢地呀。
文：CJ
