最近嘅天氣熱到人都癲，大家尚且可以返屋企涼冷氣，但其實有啲住喺劏房、板間房等等嘅街坊屋企根本冇冷氣。基督教宣道堂見到街坊嘅需要，就開放教會做避暑處。

小編今日就去咗位於大角咀嘅宣道堂，附近的確有唔少舊樓。明明教會避暑處話係12nn開放，但11am就已經有10位街坊黎咗。

教會同工Mary話，因為教會每日11:30am都會派飯，唔少婆婆會提早上黎霸位、傾偈，不過今日有街坊知道教會開作避暑處，都特登提早過黎。

冇幾耐前，Mary知道有獨居婆婆唔開冷氣，佢擔心長者喺咁熱天時會「頭暈身㷫」，因此，教會喺短時間內重新分配空間，騰出本來做功課輔導嘅地方，畀街坊抖涼，亦會提醒街坊帶水樽來拎凍水。同工都會打電話畀相熟嘅清潔工，提醒佢哋喺午飯時間去教會休息。

宣道堂堂主任陳淑娟牧師欣賞同工有愛鄰舍嘅心，見到鄰舍嘅需要，就動慈心、自發回應，唔怕自己要做多d野，「睇見需要就回應，呢個好重要。」Mary都話：「天氣咁熱，冇得再等，我們都覺辛苦，何況嗰啲婆婆，要提供地方畀佢地休息。」

至於避暑處要開到幾時，陳淑娟就話冇確實時間，視乎社區需要，天氣繼續熱，教會就繼續開，如果天氣轉涼，冇好多人黎，先再暫停做避暑處。

除咗開放教會，陳淑娟都鼓勵基督徒去派冰巾和冰水畀戶外工作嘅街坊，因為喺宜家咁熱嘅天氣下工作好易中暑，而街坊嘅工作亦未必有足夠嘅休息時間。

文：KOC