睦福總幹事姚小鳳見到政府公佈心諗：「咦？點解同我哋曾經舉辦嘅計劃名一樣嘅呢？我哋都有啲奇怪。不過唔緊要啦，啲名都幾難改嘅可能。」

政府噚日公佈「弱勢社群學生擺脫跨代貧窮行動小組」將會開展「共創明Teen」計劃，為二千名劏房戶初中生配對友師，並提供最多一萬元資助。Google一下，「共創明Teen」呢個名，原來七年前城市睦福團契（睦福） @hkpeacemaker 就已經喺兒童發展基金下嘅師友計劃用過，唔知當局度名嘅時候，有無參考過呢？

講返個計劃，姚小鳳就覺得兩個計劃內容好相似，應該九成係一樣，主要係一年同三年嘅分別。佢嘅經驗之談就係，要年輕人由計劃、實踐，甚至要同友師要建立關係，三年其實都短，唔明點解會覺得一年可以做到。

工業福音團契（工福） @hkief_ngo 都辦咗兒童發展基金下嘅師友計劃超過十年，工福義務總幹事歐偉民都覺得，一年未足以畀友師同學生建立關係，「透過咁短時期嘅支持，點可以能解決跨代嘅貧窮問題呢？」

歐偉民仲話，以往計劃中友師會導引學生點用筆錢，但如果要短時間（一年）要用筆錢，友師對學生有幾多認識呢？錢係咪可以用得其所呢？

計劃將會由政府喺商界搵一班生命師傅，歐偉民就質疑係咪剩係商界嗰種價值觀，先為之小朋友應有嘅價值呢？佢覺得當中有好大嘅問號。

文：LH