宏恩基督教學院九月起全校必修國安教育，校長崔康常之前引用羅馬書話：「在上有權柄嘅，神係使用佢哋，我哋亦都應該係一般聽上面嘅政府所有安排，如果唔係世界就會亂……無論你喺香港、美國定係澳洲，當地有佢嘅政府，用聖經去睇，都係神容讓佢哋掌權嘅。作為市民應該順應政府嘅法例做嘢，呢個好基本嘅聖經真理嚟囉。」

本身專研保羅書信嘅崇基學院神學院助理教授葉漢浩博士就喺FB不點名回應，話最常被基督教神棍老屈嘅聖經係羅馬書，而最常被基督教神棍老屈嘅人物就係保羅，「其實如果保羅真的如神棍咁講，在上位就做乜都要跟，結果起碼都做到羅馬基督教學院院長啦！使被追殺，審問，受死？其實吹神棍有沒有讀過神學？求其講下就當真？吹當真？」

關於羅馬書十三章嘅問題，以前都有好多人討論過。葉漢浩兩年幾前喺辛福台都講過，中文聖經中有兩個希臘文都被翻譯為順服，意思不盡相同：林後十5-6提及順服神時用嘅係ὑπακοή（hupakoé），指完全嘅順服、全人獻上；至於羅十三講順服掌權者時用嘅ὑποτάσσω（hupotasso），一般指禮貌性、社會的規範，係人與人相處之間嘅尊重。所以，對於政權唔係完全的順服，要跟隨善惡和公義等原則。

文：LH