MIRROR演唱會意外發生後，唔少教會信徒教牧都關心事件，又一同轉發代禱消息。但亦有人批評轉發消息、相關報導、代禱內容入面，成日強調傷者係「牧師個仔」，認為唔合適。甚至有人話，情況反映部份基督徒滿口大愛，但對關心對象就好揀擇。

前日，馬保羅牧師係自己FB出po，批評依類人就好似聖經入面嘅法利賽人同律法師，只係關注自己利益同影響力，但平時就對身邊嘅人視而不見。

馬牧師又話，香港教會一直無咩留意潮流文化，但到意外發生之後，有教會、個別牧者、領袖向信徒呼籲，話重傷者阿Mo係知名牧師個兒子，所以請大家代禱記念，相關訊息仲好快係教內傳開。「好明顯，部份基督徒廣傳代禱消息，主要係因為涉及知名牧師個仔」。

見到咁嘅情況，馬牧師朋友慨嘆，「唔怪得唔少人都覺得基督徒偽善，就係因為唔少信徒滿口大愛包容，但其實關愛對象非常有選擇性，對社會時事亦係漠不關心」。

馬牧師覺得，依個唔單只係部份信徒嘅問題，仲係成個香港教會嘅問題。仲話過去30年，教會主要都係關心自身發展同利益，不知不覺間成為左「獨善其身但又唔體恤民間疾苦嘅宗教團體」。但事實上，經歷完2019年之後，唔少香港人早已活係集體創傷之中。

佢又用路加福音7章31-35節耶穌批評宗教領袖嘅一番話，希望香港嘅教牧、長執同堂會領袖及早悔改，用耶穌基督憐憫關懷嘅眼光睇世界，謙卑真誠咁同香港人同哭、同苦、同行。唔好再淪為「吹笛不跳舞，舉哀不啼哭」嘅宗教團伙。

文︰CJ