圍爐聽書 隱世Clubhouse讀書房
書展又到，唔知大家最近有無睇書呢？
早排，編輯係Clubhouse到發現左個「圍爐取經」 @wailochuiging 嘅房間，主要係藉住信仰書討論教會、信仰問題，內容貼地又豐富，有時仲會聽到啲教會趣聞同笑料添。
自己睇書可能會睇到訓著，但聽人講就輕鬆好多。記得有一次題目係講「何必仲要返教會？」，讀緊嘅係洪麗芳 @hlf_charishung 同陳韋安 @theologia_autumnitas 寫嘅《寫給你心中尚未崩壞的地方》，moderator之一Parnell以男聲飾演洪麗芳嘅心聲，讀出書中一段洪麗芳寫比陳韋安嘅信。
讀完一小段，佢地又會就住內容分享自己睇法，有時聽眾又會上嚟講兩句，分享自己嘅經驗，之後大家又會有回應，過程有來有住，氣氛相當輕鬆自然。
唔好似為佢地淨係閒聊吹水，其實只係輕鬆地討論嚴肅話題。以「何必仲要返教會？」果集為例，講到好多人返教會係因為習慣、關係，又或為要被牧養。但主持就話，問得「點解返教會？」果班人，多數都因為唔習慣、關係唔好，又覺得牧養唔夠先咁問。面對依種信仰處境，返教會對信仰又有咩意義？
編輯早前亦親身同幾位moderator了解，提到教會活動好多時都「倒模」咁，有晒安排同既定程序；但Clubhouse就有更多空間，又可以連結唔同地方、海外嘅香港人，大家係同一個虛擬空間，一齊吹水overrun到凌晨。
至於笑料……再recap出黎就尷啦，唔建議。趁住書展季節，私心推薦大家可以試下上clubhouse聽書。
文：CJ
