究竟統一教係咩嚟？
7月8日，前日本首相安倍晉三遇刺身亡，兇手解釋犯案動機同日本統一教會有關，因為兇手母親大量捐錢比統一教會而導致家庭經濟困難，於是兇手就向同統一教會關係密切嘅安倍晉三痛下殺手。
尋日，日本統一教會會長田中富廣開記招回應事件，確認兇手母親的確係其教友，並澄清安倍晉三並唔係教會成員，但對奉獻問題就以調查當中為理由唔交代。
▍ 創立人自稱再來彌賽亞
統一教發源自韓國，由已故韓國宗教家文鮮明（Sun Myung Moon）50年代創立，全名為世界基督教統一新靈協會（或世界基督教統一神靈協會），而家改咗名做世界和平統一家庭聯合會。
文鮮明曾經話自己係再來嘅彌賽亞（Messiah of the Second Coming），佢老婆就係聖靈（the Holy Spirit），仲自稱係真父，老婆就係真母，而佢地所生嘅仔仔就無原罪。翻查資料，來自北韓嘅文鮮明1949年已經因為強迫有夫之婦同佢結婚而入獄，80年代果時，亦試過係美國因為逃稅而入獄。
▍ 辦集體配婚令「世界統一」
係韓國服侍多年嘅周志豪牧師認為，無論在教主嘅操守、婚姻道德、財務管理、傳教手段以及教理內容，統一教都好明顯係異端嚟。
周志豪曾舉分析文章，提到統一教會係財力、媒體上都好有影響力。例如係80年代，統一教係美國嘅年收入就有2000萬美元，來自日本年收入就有1億2200萬美元。一份1993年嘅調查仲話，文鮮明係全世界控制嘅商業資產有成100億美元。另一方面，統一教會又會投入好多資金用係傳媒宣傳上面，例如係《華盛頓時報》，相信係希望藉住辦報嚟宣傳其信奉的右翼思想同理念。
除此之外，統一教會推行嘅集體配婚亦引嚟唔少爭議。1992年8月，文鮮明就試過為3000對新人舉行集體婚禮；當中，好多配對嘅信眾都係互不認識，又會來自不同國家，有講法就話咁係想消除文化之間嘅藩籬，令世界統一。而就算2020年疫情係韓國升溫果陣，佢地都依然如期舉辦集體婚禮，據聞有6000對新人結婚，由世界各地嚟出席嘅有大約3萬人。
文：CJ
