〈東方之珠〉變〈離別〉 改詞盼道出香港人心聲
月初嘅時候慶回歸，劉華喺抖音度深情唱出三十幾年前羅大佑嘅作品〈東方之珠〉，聽講有網民話好感動。《聲生不息》都有唱呢首經典歌~
上星期，小編突然收到B牧師一個電話，佢話想試下新野，就係將呢首〈東方之珠〉改詞，用黎講下香港人嘅離別心情！！
說時遲那時快，牧師轉個頭就已經send左個改詞畀小編睇。哇，第一下係覺得牧師好有才，真係啱音架喎～睇返歌詞當中幾句：「難論美滿，生於這年，臨歧混亂，抉擇猶豫。你與我，如處戰亂，仍在盼望有日香港會改變。」都幾講到大家今日嘅心聲。雖然呢首歌本身有d年代感，但今時今日配上離別既詞又有種特別嘅感覺。
B牧師話，其實佢係因為有同工離港而引發起一d思緒，就試下改詞。另外，除左講出留港者嘅心情，佢其實都想表達埋離港者嘅心情。
呢首〈離別〉比起原本嘅歌詞，似乎更加令小編有共鳴呢~ 你又覺得B牧師填嘅詞點樣呢？
事不宜遲，大家一齊欣賞下B牧師嘅改詞，識唱大家一齊試下唱！
（B牧師驚大家唔識呢首歌，仲請左朋友幫手唱左個demo，有興趣嘅朋友可以㩒入link度聽下：https://bit.ly/離別demo2 ）
〈離別〉
曲：羅大佑（〈東方之珠〉）
詞：B牧師
1.前路渺渺，北風正寒，
懷念舊日，往事難忘。
你與我，遙隔兩岸，
難免會問你在他方會點？
人是旅客，匆匆上船，
離別話舊，再現從前。
再見了！還會見面！
仍在惦念你在他鄉的挑戰。
臨別在說總要說的話：求神多眷顧，時常都看顧，記住穿暖！
仍然未說想要說的話：人情雖冷暖，時常都會轉，此心不變！
2.明月朗朗，天氣轉涼，
懷念舊日，往事迷茫。
你與我，遙隔兩岸，
誰又會令我內心裡似交戰？
難論美滿，生於這年，
臨歧混亂，抉擇猶豫。
你與我，如處戰亂，
仍在盼望有日香港會改變。
臨別在說總要說的話：求神多眷顧，時常都看顧，記住穿暖！
仍然未說想要說的話：人情雖冷暖，時常都會轉，此心不變！
3.人在老遠，追憶往時，
眷戀香港，徹夜難眠，
縱我遠去，仍會掛念，
仍會掛念妳在他方會點？
離亂世界，烽火正燃，
炮火硝煙，美夢難圓。
這苦海，何處是岸？
何處會是我地心中的伊甸？
何處會是我地一生的依戀？
