東華三院黃笏南中學中五生林澤駿 @leunzz 上個月向平機會投訴，質疑禁男生留長髮校規違反《性別歧視條例》。教過中學倫理與宗教科嘅教大學者潘宇軒就認為，關於身體自主嘅討論，牽涉學生有幾大程度可以決定點樣表達自己嘅身體。

佢覺得我哋要問：「想唔想下一代有更大嘅空間，去呈現自己係一個點樣嘅人；定係想佢哋喺讀書嘅階段，將自己當成同所有人一式一樣，係一粒隨時可以替換嘅螺絲？」

潘宇軒仲話，女仔可以留長頭髮，但係男仔唔可以，會令男仔覺得受到較差待遇，又話每個人喺上帝面前都係平等嘅受造物，爭取平等機會本身同基督教價值相融。

佢話每個時期都有主流價值定義人，以前帶手提電話返學都會畀人覺得係壞學生，但而家都知唔關部手機事，「校規有演變好正常，主流價值觀本身都會變。」

無論學校定教會，潘宇軒覺得一個社群定規矩都要大家認同，相信學生都唔係要推翻一切校規，如果學生見到學校都願意回應佢地，畀學生參與或者至少被諮詢，對學校嚟講都係良性發展，「學生知道你當佢嘅聲音係聲音，將來肯遵守有份定嘅規則機會更大。」佢認為社會有不同聲音好正常，希望學校處理時體現教育嘅價值，而唔係覺得有人搞對抗「你死我活」。

文：LH