「努力唔一定有結果，至少我努力過」

DSE前日放榜，大家嘅焦點好似只係考得好嘅人，但其實有唔少人收到成績表嘅時候，都會失望、不解。

小編邀請咗幾位上屆DSE考生，分享佢哋由DSE放榜到派JUPAS，直至宜家讀左一年大學嘅心路歷程。或許佢哋曾經經歷嘅，同宜家嘅你一樣。

🔺Ching：差一分先入到最想讀嘅科，上帝係咪玩我？

由中四開始就好想讀CU Nursing嘅Ching，收到成績表即場喊咗出黎，因為自己最拿手、放得最多時間嗰科跣咗手，唔明點解擺咁多時間都係得尼個分數，覺得「CU冇啦！」

後來，佢買翻卷黎睇，發現自己距離cut-off分數只差一分，又喊咗一次。佢覺得好唔值，最努力的科成績未如預期，又入唔到最想入嘅科。佢問上帝：祢係咪玩我？

雖然佢之後入左A2嘅PolyU nursing，但佢之後都不斷向朋友呻。最無奈嘅係，連PolyU係紅磡站嘅出口都係A1，令佢行過都覺好唔開心。

宜家讀咗一年，Ching冇再呻點解冇得讀CU，因為佢愈讀愈覺得PolyU適合自己，無論係課程上嘅節奏，定係同同學嘅相處。過咗一年，佢先覺尼個係神最好嘅安排。

🔺Daniel：心儀女仔低分過我都入到，神點解咁安排？

Daniel放榜嗰陣對自己嘅分冇乜感受，但見到身邊最勤力、最畀心機、補最多習嘅同學，中英文都2咗，佢好覺得，世界不似人所預期，唔係最努力就有好結果，「最後人哋只會睇你Lv2，就冇大學讀，唔會care你背後付出幾多。」

之後佢想同心儀嘅女仔一齊報教大，點知個女仔低佢兩分都入到，自己反而入唔到。佢問神：「點解我高分過個女仔，但我入唔到最心儀嘅科？點解你嘅安排咁唔似預期？」

雖然入唔到教大，但讀緊MU嘅Daniel喺大學識到朋友、搵到興趣、參加大學團契，都好開心；心儀嘅女仔又開朗咗；中英文炒咗嘅嗰位同學入咗HKCC，讀到自己拿手嘅科，之後升得翻八大。

回望翻轉頭，Daniel覺得每人都好似找到最好的安排。佢話：「收到成績當下係接受唔到，係有開心同失望，但無論起點如何，最後係睇你點樣繼續行落去，行落去就會見到希望。」

🔺阿so：你而家話DSE冇乜野，但你嗰時一定唔會咁講

上面兩位同學好似輕描淡寫咁，另一位上屆考生阿So都話：「好多人宜家睇翻，都會覺得DSE冇乜野，但你嗰時一定唔會咁講；即使你嗰陣時知道讀asso有機會上翻大學，但DSE的確係一個關口，對好多人嚟講好重要，好似讀十幾年書都係為咗DSE。」

阿so中四開始就想讀CU中文系，甚至記住嗰科編號係JS4018。考DSE時佢好大壓力、會失眠、考試途中肚痛，但佢嗰段日子好感受到上帝所賜嘅平安。

所以放榜之前，佢都唔算太擔心，感覺盡咗力，都冇野可以做，相信天父有佢嘅帶領，最後分數出咗黎，佢入唔到CU中文系，但佢明白「努力唔一定有結果，至少我努力過。」

文：KOC